Footer

3 agkaskasera, natakawan

VIGAN CITY – Tallo nga agkaskasera iti Barangay Tamag ditoy siudad ti natakawan bayat ti pannaturogda a mapapati a napasamak idi rabii ti Oktubre 1.

Nagpulong iti polis da Marlon Tubera y Laquesta, 26, baro, media personnel nga agtrabtrabaho iti DZVV ken residente iti Barangay Calingayan, Sinait, Ilocos Sur ken Gilbert Pila y Guetteng, 29, baro, teknisian ti nasao met laeng a radio station ken residente iti Barangay Aldan, Burgos, Ilocos Norte, agpada nga agkaskasera iti Mean City Boarding House iti nadakamat a barangay nga awanen dagiti selponda idi makariingda iti agsapa ti Oktubre 2.

Segun dagiti dua, naturogda, kaduada ni Greggy Tubera y Somera, 23, baro, agkaskasera met iti nasao a boarding house iti agarup 10:00 ti rabii ti Oktubre 1 ket idi agarup 4:45 ti kabigatanna, nasukalanda laengen nga awanen ti selponda a Nokia, Samsung ken Galaxy nga agbalor iti sumurok kumurang P10,000.00 ken ti petaka ni Marlon Tubera a naglaon kadagiti IDs, dokumento ken cash money a P2,000.00 nga inkabilna iti ngatuen ti katrena.

Nakastrek dagiti mannanakaw babaen ti panangdadaelda iti ridaw ti kuartoda ket daytoy met laeng ti rimmuaranda.#