BANTAY, Ilocos Sur – Agbabawi man dagitoy tallo nga agtutubo ngem saanton a mapunas ti rekord iti polis a nasukalanda a nagtakaw iti kalding idi apaglabes ti tengnga ti rabii ti Pebrero 27.
Natiliw da Widen Gallardo y Tacloban, 20, mannalon; Jay Tacloban y Montero, 18; mannalon, agpada a residente iti Brgy. Quimmarayan, Sto. Domingo, Ilocos Sur; ken Marlon Espanillo y Pescador, 18, baro, helper ken residente iti Brgy. An-annam, Bantay, Ilocos Sur, a nagimet iti dua a kalding sadiay Barangay Sinabaan, Bantay idi agarup 12:48 ti bigat ti Pebrero 27.
Ngem kinuna da Gallardo ken Tacloban nga iti dayta a rabii, inayaban laeng ida ni Espanillo a mapan mangala iti kalding ti lolona a partienda.
Kinuna met ni Espanillo a nakainom iti dayta a rabii ket dina malagip ti inar-aramidna.
Kinuna ti akinkukua ti kalding a ni Rogelio Cortez, 60, residente iti Barangay Aggay, Bantay, a ni la Marlon Pescador ti am-ammona kadagiti suspek agsipud ta sakbay ti pannakatakaw dagiti kaldingna, daytoy ti tinangdananna a nagtrabaho iti kabakiran a nakaiwaywayan dagiti kaldingna.
Segun iti report manipud iti polis-Bantay, bayat ti panag-checkpoint da Kagawad Magno Cariaga ken Sigmund Cariaga ken Joel Piano, agpada a barangay tanod, nakitada dagiti tallo a suspek a nakalugan iti motorsiklo a nangballasiw iti kalsada ket idi nasilawan ida ti agpalaud a lugan, maysa kadakuada ti adda impalladawna a nakaawisan ti atension ti barangay tanod a ni Cariaga.
Inasitgan dagiti tallo dagiti suspek ket nakitada nga adda pay sabali a kargada a kalding,
Idi napagsaludsodan dagiti suspek, agduduma ti sungbatda isu a pinakaammuan ni Kagawad Cariaga ni Barangay Captain Gilbert Palacpac ket inreport met daytoy iti police station.
Nagresponde dagiti polis ket innalada dagiti suspek agraman dagiti dua a kalding nga awitda.
Kinuna ni Cortez a saanen nga agdarum pay no bayadan dagiti suspek dagiti tinakawda a kalding.
Ipetpetteng ni Cortez a tallo a kalding ti mapukpukaw ngem kinuna met dagiti suspek a dua laeng a kalding ti tiniliwda iti dayta a rabii.
Nupay kasta, kinuna dagiti suspek nga iremedioda a bayadan dagiti tinakawda a kalding.#
