3 aksidente ti lugan, 3 nasugatan

CANDON CITY –  Tallo a nagsisina nga aksidente ti napasamak itay nabiit iti Sta. Maria, San Esteban ken ditoy siudad a nakadunoran ti tallo a tattao.

Nagsinnapgid ti motorsiklo a minaneho ni Romulo Tugade, 36, residente iti Nalvo, Sta. Maria, Ilocos ken ti bisikleta a linuganan ni Alex Guerrero, 39, residente iti Mambug, Burgos, Ilocos Sur a puon ti nakayospitalanda.

Segun iti inbestigasion, agsarsaruno dagiti dua nga agpaabagatan idi kellaat a nagsikko ni Guerrero a nakalugan iti bisikleta ket nasapgid ti motorsiklo a minaneho ni Tugade.

Naitaray dagiti dua iti Reyes Clinic and Hospital para iti pannakaagasda.

Iti San Esteban, nagsinnapgid iti sanguanan ti Pentecostal chapel iti Barangay San Rafael ti Honda XRM a minaneho ni Glenn Tulas, 27, residente ti Ricuda, Sinait, Ilocos Sur ken ti chop-chop motorcycle a minaneho ni Benjamin Cabalo, 70, residente iti San Rafael, San Esteban, Ilocos Sur.

Agpapaamianan ti XRM idi mapapati a bimmallasiw iti kalsada ti chop-chop a puon ti nagsinnapgidanda.

Nupay kasta, awan ti naan-ano kadagiti dua a nakamotor.

Kabayatanna, maysa a bus ken maysa a trak ti nanglipit iti traysikel a minaneho ni Roderick Urbano, residente iti San Isidro ditoy a siudad a puon ti nakadundunoranna.

Saan a naan-ano ni Rodita Buenafe, residente iti Caboloan, Bangued, Abra, ti kaduana a naglugan iti traysikela.

Iti inisial nga inbestigasion ti polis, agpapaamian ti traysikel  a Honda TMX 155, addaan plaka QJ-9929, a minaneho Urbano ken sarsarunuen ti Florida Bus, addaan iti plaka PXG-838, a minaneho ni Diosdado Pablo, residente iti Santo Nino, Claveria, Cagayan idi napukaw ti biktima ti kontrol ti manibela ket nakakaut iti bangir a linia.

Ngem sumungad met ti Fuso truck,  addaan plaka TCJ-599, a minaneho ni Eduardo Agullana, residente iti Belloca, Batac, Ilocos Norte ket ditan a napasamak ti aksidente.

Naitaray ti biktima iti Candon City Hospital. (Danny Antalan)