Footer

3 annak ti Sto. Domingo, Fr. Jose Burgos Achievement Awardees

VIGAN CITY – Pito nga annak ti Ilocos Sur ti napadayawan iti Fr. Jose Burgos Achievement Award iti programa a naangay iti Plaza Salcedo idi rabii ti Pebrero 2.

Napadayawan da Dr. Lauro Tacbas (edukasion), dati a Diputado Mariano Tajon ken dati a Diputado Salacnib Baterina (serbisio iti gobierno), agpapada a tubo ti Sto. Domingo, Ilocos Sur.

Karaman dagiti dadduma pay a napadayawan da  Dr. Alfredo Rabena (sensia ken teknolohia), Dr. Agustin Molina, Jr., (sensia ken akademia), dati a mayor ti San Emilio Leon Lais (panangidaulo iti komunidad), ken agdama a chairman ti KBP, Ilocos Sur Chapter Crisostomo Ilustre (literatura).

Naipaay iti Rural Improvement Club ti Balidbid, Salcedo ti Fr. Jose Burgos Special Award kas panangbigbig ti gobierno probinsial iti pannakapilina a National Gawad Saka Awardees itay napan a tawen.

Mait-ited ti Jose Burgos Achievement Award kadagiti annak ti Ilocos Sur a nagballigi iti tay-ak a sinerkanda, kas maysa kadagiti tampok iti pannakaselebrar ti Kannawidan Ylocos.#