Footer

3 babai nagipasupli bogus a kuarta, natiliw

SAN FERNANDO CITY, La Union – Tallo a babbai a nagipasukat kadagiti bogus a kuarta ti tiniliw dagiti polis iti  uneg ti tiendaan publiko ti Barangay Rosario ditoy siudad idi bigat ti Agosto 19.

Inaresto dagiti polis dagiti suspek a tallo a babbai nga isuda Norie Reyes, Normina Salam ken Marivic Carreon, agpapada a residente iti Quiapo, Manila kalpasan a natiliwanda nga agipaspasupli kadagiti bogus a papel de banko a pinagbayadda kadagiti ginatangda iti Rosario Public Market iti nadakamat nga aldaw.

Nagpammarang dagiti tallo a kustomer ket bogus a kuarta ti impasuplida kadagiti ginatangda a tagilako iti tiendaan.

Kanaig daytoy, iti isu met la nga aldaw, nangipakat dagiti polis iti follow-up operation a nagtungpal iti pannakakumpiskada kadagiti bogus a kuarta iti nadumaduma a denominasion nga agdagup amin iti P53,000.00  idiay Vida Court, Camp One, Rosario, La Union a nagdagusan dagiti suspek a nagpatnag.

Nayuli ti darum nga estafa and violation of Article 166 and 168 of the Revised Penal Code (forging banknotes and illegal possession and use of false bank notes) kontra kadagiti suspek iti opisina ti provincial prosecutor  a naka-docket iti babaen ti Inquest No. I-02A-INQ-12A-00006.

Iti pannakaisurat daytoy, nakabalud dagiti suspek ken adda met iti ikut dagiti polis dagiti ebidensia para iti umno a disposisionda.#