3 babbai, imbuking ti CCTV a nagisakibot iti tagilako

STA. LUCIA, Ilocos Sur – Circuit Camera television ti nangibuking kadagiti tallo a babbai ken maysa a lalaki a nagpanggep a mangipuslit kadagiti kinurimesda a tagilako iti maysa a groseria sadiay Barangay Barangobong, ditoy nga ili idi malem ti Disiembre 2.

Nabigbig dagiti suspek a da Gina Castro y Celeni, 49; Ruby Ruance y Brin, 39; Rowena Pelayo y Anida, 38,  agpapada a balasang, ken mapapati a residente amin iti San Carlos Heights, Baguio City; ken ti parasiputda a ni Noe Mallorca y Darroca, 36, naasawaan, ken kalugaran met laeng dagiti babbai.

Segun ken ni Judy Cabrera y Moreno, 28, balasang, supervisor ti Golden E-Mart Grocery a masarakan iti Barangay Barangobong, nabuking dagiti suspek babaen ti naipasdek a CCTV iti uneg ti pagtagilakuan.

Kinuna ni Cabrera nga idi agarup 3:40 ti malem ti nadakamat a petsa, nasiputanna iti monitor ti CCTV a nagisakibot da Castro, Pelayo ken Ruance kadagiti gatas iti shorts ken paldada idinto a nagbalin a parasiput ni Mallorca.

Inawagan ni Cabrera dagiti padana nga empleada ket nagpatulong tapno malapdan dagiti suspek a mangipuslit kadagiti insakibotda a tagilako babaen ti pannakarikisada.

Narekobre iti ikut ni Castro ti maysa a Nido Junior powdered milk, 700 grams, ken Enfapro A+ 350 g; Nido Junior 700 g, Enfakid A+, 350 g ken Enfapro 350 g manipud iti ikut ni Pelayo; ken Nido Junior 700 g ken Anlene  400 g manipud ken ni Ruance.

Agbalor amin iti P2,593.00 dagiti tagilako a kinurimes dagiti tallo a babbai.

Naduktalan pay ni Cabrera iti panangrebiona iti video a sabali pay a lalaki a mapapati a kadua met laeng ti grupo ti natiliw ti CCTV a nagisakibot iti gatas iti shortna.

Ngem mapapati a nakapuslit ti lalaki kalpasan ti insidente.

Naipan dagiti suspek iti police station ditoy paran iti umisu a disposision.#