VIGAN CITY – Tallo a babbaro ti tiniliw dagiti polis ditoy gapu iti mapapati a panangdadaelda iti barandilias ken dagiti masetera iti uneg ti maysa a pagadalan ditoy siudad.
Naipan iti police station da Billie Joe Agup, 19, residente iti Barangay 9; Gregorio Laureta, 18, agnaed met laeng iti nasao a barangay; ken Narciso Amano, 22, residente iti Barangay Paratong ditoy met laeng siudad kalpasan a nagpulong ti watchman ti Vigan Central School a dinadaelda ti landok a barandilias ti maysa a monumento ken dagiti masetera iti pagadalan.
Sakbayna, mapapati a nagiinom dagiti tallo iti kiosko ti pagadalan.
Pinaglibakan dagiti tallo a nagdadaelda iti pagadalan. Nupay kasta, inannugotda a nagiinomda iti lakon ti pagadalan.#