3 balay, nasukisok, droga, drug paraphernalia, nakumpiska

SANTIAGO, Ilocos Sur – Positibo ti resulta ti nagsaruno a search operations nga insayangkat ti kapolisan itay napan a lawas iti tallo iti uppat a balay iti Vigan City ken ditoy nga ili a nakasamsamanda kadagiti droga ken drug paraphernalia.

Iti Vigan City, nakakumpiska kadagiti mapapati a shabu ken drug paraphernalia ti nagtitipon nga elemento ti PDEA ISSET, ISPAIDSOTG, RIU ken Vigan City Police Station nga indauluan ni Supt. Maximo Taclas, OIC, bayat ti insayangkatda a search operation iti balay da Nelson Adame y Pilien, 41, naasawaan, ken Sherwin Pugal, 30, naasawaan, agpada a residente iti Barangay Capangpangan.

Negatibo ti resulta ti panagsukisok iti balay ni Efren Pugal y Ben.

Sinaksian dagiti barangay officials, DOJ representatives ken kameng ti media dagiti naisayangkat a panagsukisok a naipakat idi agarup alas sais ti malem ti Agosto 26.

Naipan dagiti suspek iti police station ti Vigan para iti umno a disposisionda idinto a naipatulod dagiti nakumpiska a bambanag iti PNP Crime Laboratory Office para iti pannakaamirisda.

Kabayatanna, nangisayangkat ti joint elements ti ISPAIDSOTG, PDEA ISSET, ken polis ditoy nga ili idi Agosto 29 iti panagsukisok iti balay ni Renato Tengsico y Collado, 66, naasawaan, ken residente iti Barangay Poblacion Norte, ditoy nga ili a nakakumpiskaranda iti uppat a a pedaso ti nadumaduma ti kadakkelda  a heat-sealed plastic sachet a mapapati a naglaon iti shabu a mapattapatta nga agdagsen iti  sumurok kumurang 10 grams ken agbalor iti P70,000.00, nagawangan a sachet a mapapati a naglaon iti shabu residue, ken nadumaduma a drug paraphernalia a pakaibilangan iti 2 nga improvised tooter, 6 improvised foil tooter, aluminum foil, sachet a maaramat iti repacking, ken sensilio iti nadumaduma a denominasion, ken selpon.

Naipan dagiti nakumpiska iti  PDEA Regional Office Crime Laboratory idinto a naikustodia ti suspek.

Sinaksian dagiti barangay officials, DOJ ken media representatives ti panagsukisok.#