3 barangay captain, napili babaen ti konbension

QUIRINO, Ilocos Sur – Sabsabali a wagas ti pannakapili dagiti tallo a barangay captain ditoy nga ili.

Naammuan ti Tawid News a sakbay ti panagipila iti certificate of candidacy dagiti agkandidato para barangay captain, naangay ti maysa a konbension a nakapilian ti agkandidato iti nasao a posision.

Segun ken ni nailayon a Barangay Captain ti Namitpit Gil Sominggao, napili babaen ti konbension dagiti barangay captain ti Barangay Lamag, Banuen ken Cayus.

Innayon ni Sominggao a dimmar-ay iti nasao a konbension dagiti botante nga agnaed kadagiti nadakamat a barangay ket babaen ti nalimed a panagbutos, pinilida ti barangay captain a kayatda a mangidaulo kadakuada.

Dagiti naabak iti konbension a para kapitan ket saandan a nagtuloy a nangipila iti COCda.

Iti kaaldawan ti eleksion, pormalidad laengen a binutosan dagiti agindeg ti barangay captain a pinilida iti konbension.

Kaarngi daytoy pannakapili dagiti barangay captains babaen ti konbension ti dap-ay, maysa a daan a nakaugalian a mapaayaban amin dagiti dadaulo ti barangay tapno tratarenda ti maysa a problema a pakaseknan dagiti bumarangay.

Siam amin dagiti barangay ditoy nga ili. Iti dua a barangay, ti  Suagayan ken Poblacion, awan ti kinasango ti nagkandidato a barangay captain.#