3 dadaulo a politiko immawat iti Fr. Jose Burgos Service Award

VIGAN CITY – Tallo a patneng a politiko ken naggobernador iti Ilocos Sur ti nakaitedan iti Fr. Jose Burgos Service Award iti damo a panangselebrar ti probinsia iti Kannawidan Ylocos Festival itay nabiit.

Inawat da dati a Gov. Luis “Chavit” Singson, dati a Gov. Carmeling Pichay Crisologo ken Dr. Godofredo S. Reyes ti pammadayaw iti Parangal ng Kapitolyo iti rabii ti Pebrero 3, maudi nga aldaw ti parambak.

Immawat met iti pammigbig dagiti residente ditoy a kaaduanna iti estudiante, empleado ti gobierno ken adda iti pribado a sektor a nakaited iti pammadayaw iti probinsia gapu iti panangabakda kadagiti nakisalipanda.

Ni Singson ti mabigbig a kingmaker iti politika iti Ilocos Sur kas pinatalgedan iti nasurok tallo dekada a panagtakemna kas gobernador ken naminsan a daras a diputado iti umuna a distrito ti probinsia.

Pinutarna ti R.A. 7171 a nangituding iti pannakaited iti bingay  kadagiti probinsia nga agmulmula iti tabako a pakaibilangan ti Ilocos Sur, Ilocos Norte, La Union ken Pangasinan manipud iti excise tax ti mapartuat a sigarilio.

Limtuad ni Singson a kangrunaan a testigo iti mapapati a payola manipud iti hueteng maikontra ken ni dati a Presidente Joseph Estrada ken maipagarup a panangala ti dati a gayyemna iti P130-M a bingay ti probinsia iti R.A. 7171.

Kinombiktar ti Sandigan Bayan ni Estrada iti plunder a ni Singson ti maysa kadagiti kangrunaan a testigo.

Nupay kasta, inikkan ni Pres. Gloria Arroyo ni Estrada iti presidential pardon.

Idi panawenna, ni  Crisologo ti dadaulo ti politika iti probinsia, aglalo idi sibibiag pay daydi Dip. Floro Crisologo a kaingungotna.

Maysa a pakalaglagipanda nga agassawa ti pannakaipasdek ti University of Northern Philippines, maysa itan kadagiti kalatakan nga unibersidad iti Amianan a Luzon.

Agdama a diputado iti Quezon City ni Vincent “Bingbong” Crisologo nga anakna.

Saan laeng a politika ti nakabigbigan ni nagdiputado, ken dati a Gobernador Reyes no di pay iti medisina ken literatura Ilokana. Mabigbig a poet laureat, nagpresidente iti Gumil-Ilocos Sur sa iti Gumil-Filipinas, ken napadayawan iti Gawad Pambansang Alagad ni Balagtas ken Pedro Bucaneg awardee ti Gumil-Filipinas.

Nagpatingga iti Pebrero 3 ti makalawas a festival kas paset ti panangselebrar ti probinsia iti isisinana a probinsia manipud iti Ilocos Norte ken La Union babaen ti Royal Decree a naipaulog idi Pebrero 2, 1818.

Kinuna ni Savellano a dakdakkelto pay ti sumaruno a festival ta panggepna nga awisen dagiti kabangibang ti Ilocos Sur a probinsia a makipartisipar.#