3 drug personalities, pinaltogan armado a tattao; 2 nagudas, maysa nakataray

SINAIT, Ilocos Sur – Dua manen a drug personality ti napapatay, idinto a nakataray ti maysa iti nagsisina nga insidente ti pammaltog a napasamak itay lawasna iti Sinait, Magsingal ken Santiago┬á a mapapati a nagtagiramut iti illegal drug trade.

Napapatay ni Leonardo Bongolan y Garcia, 59, awanan asawa, mannait, iti uneg ti balayna sadiay Barangay Guinabang, Santiago, Ilocos Sur idi malem ti Agosto 16 ; ni Eugene Vergara y Aganon, 51, naasawaan, iti uneg ti up-upaanna a balay idi agarup 7:25 ti sardam ti Agosto 18; ni Franky Usana y Urbien, 29, awanan asawa, iti sango ti balayna idi dandani alas 10:00 ti rabii idi Agosto 18.

Agpada da Bongolan ken ni Vergara a dead on arrival iti nakaitarayanda nga ospital. Nupay nagsagrap kadagiti sugat iti nadumaduma a paset ti bagina, nakataray ni Usana ken nakapagpaarayat. Segun iti report, naitaray iti Metro Vigan Cooperative Hospital, Bantay a pakatamtamingan dagiti sugatna.

Illegal drug trade ti anggulo a kitkitaen dagiti inbestigador agsipud ta drug personalities dagiti biktima.

Kas maibatay iti blotter ti Santiago police station, agbuybuya ni Bongolan iti telebision iti uneg ti balayna idi simrek lattan dagiti armado a lalaki ket pinaltoganda ti biktima a nagsagrapanna kadagiti sugat iti nadumaduma a paset ti bagina.

Naglibas dagiti di nabigbig a suspek iti saan nga ammo a direksion.

Iti panagproseso ti SOCO team manipud iti PNP Crime Laboratory Office, Candon City, nakarekobreda iti lima a kapsula manipud iti cal. 45; 2 metallic fragments ken maysa a deformed slug. Timmulong pay dagiti miembro ti KIMAT manipud iti Candon City, Galimuyod, San Esteban ken Salcedo iti panagimbestiga mainaig iti pammaltog.

Nakalista ti biktima kas drug personality ken agop-operasion iti ili ti Santiago.

Iti met pammaltog sadiay Barangay Namnama, Sinait, adda ni Vergara iti uneg ti kaserada idi simrek lattan dagiti suspek babaen ti panangdadaelda iti ruangan sada pinaltogan ti biktima iti sumagmamano a beses a nakatiruan ti nadumaduma a paset ti bagi daytoy.

Natamaan pay iti naiwawa a bala ti makannawan a baba ti kilikili ti asawa ni Vergara a ni Gloria, 49, nursing aide.

Naitaray dagiti biktima iti Corpuz Clinic and Hospital ngem naideklara ni Vergara nga awanen ti biagna.

Kitkitaen dagiti polis no adda pannakainaig ti pammapatay iti droga agsipud ta drug surrenderee ni Vergara ken karaman iti drug personality watch list ti Sinait  police station.

Kabayatanna, iti mismo a sanguanan ti balayna sadiay Sitio Dinumaran, Barangay Patong, Magsingal ti nakapaltogan ni Usana bayat ti panagbambanna.

Kas maibatay iti inbestigasion, kellaat lattan a nagparang dagiti armado a suspek sada pinaltogan ti biktima iti sumagmamano a beses a nakatiruan ti rupa, makannigid nga ima ken saka daytoy.

Ngem nakataray ken nakapagpaarayat ti biktima.

Sangapulo a kapsula manipud iti cal. 5.56 ti narekobre ti SOCO team manipud iti Ilocos Sur PCLO iti crime scene. Timmulong met iti inbestigasion dagiti kameng ti KIMAT manipud Sto. Domingo ken San Ildefonso police stations.

Saan a nailanad iti blotter ti motibo pammaltog ngem drug surrenderee ni Usana iti Magsingal police station.#