3 drug pusher, naipalab-og iti buy bust operation

VIGAN CITY – Iti panagtuloy ti naing-inget a kampania ti kapolisan maikontra iti illegal a droga, tallo manen a drug pusher ti natiliw iti nagsina a buy bust operation a naipakat iti Vigan City idi Mayor 18 ken iti Barangay Concepcion, Cervantes idi Mayo 19.

Iti buy bust operation nga inwayat ti PDEA ISSET 1, PAIDSOTG ken Vigan City police station sadiay Barangay Pantay Fatima, Vigan City, naapputda da Sannydel Lopez Galayen, 37, naasawaan, ken residente iti Barangy IX, Vigan City, ken ni Berwin Mariano Simeon, 32, natibo iti Boliney, Abra.

Nakakumpiska dagiti operatiba iti ikut dagiti dua iti 10 a heat sealed plastic sachet a naglaon iti mapapati a shabu; maysa a heat sealed plastic sachet a naglaon iti white crystalline substance; marked money a P500.00 nga addaan serial number DX677743; glass tooter; improvised aluminum tooter, sumagmamano a nagetteng a plastic sachet nga addaan shabu residue; weighing scale; narolio nga aluminum foil ken sumagmamano a plastic sachet a maaramat para repacking.

Sinaksian dagiti barangay officials nga indauluan ni Brgy. Captain Larry Raboy, Edison Raboy ti TVigan, ken Glenn Tulas, manipud iti opisina ti provincial prosecutor, kas pannakabagi ti DOJ.

Naipan dagiti naaresto iti PDEA ISSET1, Regional Office para iti maikanatad a disposision.

Positibo met ti resulta ti buy bust operation nga inwayat ti Cervantes police sadiay Barangay Concepcion, Cervantes, Ilocos Sur maikontra ken ni Mateo Ramirez, Jr. y Policay, 41, naasawaan, laborer ken residente iti Barangay Namitpit, Quirino, Ilocos Sur.

Nakakumpiska dagiti polis iti ikut ni Ramirez iti maysa a heat sealed sachet a masuspetsa a naglaon iti shabu; maysa a P500.00 ken 5 a sag-P100.00 a marked money, ken personal a kuarta ti suspek nga agdagup iti P2,663,00; maysa a Myphone cellular phone; ken ti inaramat ti suspek a Euro motorcycle.

Kabayatanna, naiyendorson iti City Prosecutor’s Office, Vigan City, iti kaso a panaglabsing iti RA 9165, partikular ti Section 6, 7, 11, 12 and 15 of RA 9165 maikontra kada Jerome Capusi Bascon, 33, baro, ken ni Precious Cesar Cabanas, 26, awanan asawa, ken maysa nga Amado Lacaniel Fernandez, 26, naasawaan, ken residente iti Barangay Otol-Patac, San Ildefonso, Ilocos Sur.

Maipalagip nga idi Mayo 14, sinukisok ti kapolisan ti balay da Capusi ken Cezar iti Barangay Pantay Fatima, Vigan City, a nagresulta iti pannakakumpiska dagiti sumaganad: 4 heat sealed transparent plastic sachets a naglaon iti white crystalline substance a mapapati a shabu; 4 improvised totters; 8 nga usado nga aluminum foils; 2 narolio nga aluminum foil; cash money nga agdagup iti P933.00; sumagmamano a plastic sachets para repacking; ken MyPhone cellular phone.#