3 empleado ti DPWH, natakawan bayat pannaturogda

STA. CRUZ, Ilocos Sur – Tallo nga empleado ti Department of Public Works and Highways, Region 1, San Fernando City ti natakawan bayat ti pannaturogda ket kinasakas ti mannanakaw ti kuarta, selpon ken dadduma pay a napateg a gamitda idi nasapa a bigat ti Nobiembre 22.

Mismo a nagpulong dagiti biktima a nainaganan nga Engineer Larry Angelo Flores, residente engineer;  Engineer Willer M. Bince, project engineer; ken Alfredo R. Valdez, quality controller, a sinerrek dagiti mannanakaw ti kaserada iti manipud alas 10:00 ti rabii ti Nobiembre 21 agingga iti agarup alas 3:00 a.m. ti Nobiembre 22.

Segun ken ni Bince, naturogda iti agarup 10:00 ti rabii ti Nobiembre 21 ket idi agarup alas 3:00 ti bigat ti Nobiembre 22, bimmangon tapno umisbo ngem naduktalanna nga awanen ti selpon ken bagna.

Riniing ni Bince dagiti kakaduana ket naduktalanda a mapukpukaw dagiti alikamenda.

Nakitada dagiti dadduma nga alikamenda a naiwarawara iti ruar ti kaserada iti asideg ti ruangan.

Kinuna ni Flores a napukaw ti kuartana a P21,122.00; 450 euros; 2 Samsung cellular phones; maysa a Corel 5 Sony Vio laptop; ken maysa a Sony camera.

Segun ken ni Bince, natakaw kenkuana ti P8,000.00; dua a selpon (Samsung ken Nokia); idinto a P100.00 ken ni Valdez.

Kinuna ni Ferdinand Marquez, landlord, a nangegna ti panagtaultaul ti asoda ngem dina intaltalek ta awan met ti nadlawna a suspetsoso a napasamak.

Nagpatulong ti police station ditoy iti SOCO team, Candon City bareng makaalada kadagiti lemma ti ramay dagiti nangserrek iti kuarto dagiti biktima.#