3 estudiante, natiliw bayat ti pot sessionda

SANTIAGO, Ilocos Sur – Tallo nga estudiante ti nasukalan nga agsulsul-oy iti asuk ti maiparparit a droga iti asideg ti pagadalanda sadiay Barangay Poblacion Norte ditoy nga ili idi aldaw ti Agosto 15.

Naipaima kadagiti nagresponde a polis nga indauluan ni Chief of Police Senior Inspector Roderick Abenojar Vintero da Marcial Gamata y Buenavidez, 18, Mark Kevin Funtanilla y Sabado, 16, agpada a residente iti Barangay Ambucao, ken ni Jayrold Capirma y Lacaden, 14, residente iti Barangay Imus, agpapada amin a third year high school students iti Santiago National High School.

Segun iti report, natiliwan ni John Rey Lucero y Sumacbay, security guard ti Ilocos Sur Polytechnic State College (ISPC), dagiti estudiante bayat nga ang-angayenda ti pot session iti ruar ti pagadalan, partikular iti amiananen ti Ilocos Sur Polytechnic State College (ISPSC).

Nakumpiska iti ikut ni Gamata ti uppat a pedaso ti napagango a bulong ti marihuana a naipakete iti electric tape nga agbalor iti sumurok kumurang P400.00 ken maysa nga usado nga aluminum foil.

Inkuyog dagiti polis dagiti estudiante iti police station para iti dokumentasion ken inbestigasion.

Kalpasanna, naipan ni Gamata agraman dagiti nakumpiska kenkuana iti Crime Laboratory, PDEA, PRO1, Camp Diego, San Fernando City, La Union para iti laboratory tests idinto a naiyendorso da Funtanilla ken Capirma iti Municipal Social Welfare and Development Office para iti counseling.

Iti kaudian a report, naiyendorson iti provincial prosecutor’s office ti kaso a panaglabsing iti Section 11 iti babaen ti Article II ti RA 9165 maikontra ken ni Gamata.#