3 ginandat a gudasen dua a lalaki

STA. MARIA, Ilocos Sur – Dua a lalaki ti nanggandat iti biag ti dua a babai a negosiante ken maysa nga estudiante a lalaki iti pammaltog a naisayangkat iti Barangay Lubong ditoy nga ili idi rabii ti Pebrero 3.

Naitaray iti Reyes Clinic and Hospital da Gloria Raposas y Aninag, 48, awanan asawa; Fely Estrada y Dato, 47, naasawaan, agpada a negosiante, ken ni Christian Estrada y Dato, 16, 4th year high school, agpapadada a residente iti Barangay Tangaoan ditoy nga ili.

Saan a nabigbig dagiti suspek a naglibas kalpasan ti pammaltog.

Segun iti panagimbestiga dagiti nagresponde a polis, agpaabagatan a direksion ti Suzuki tricycle a minaneho ni Raposas, ket idi makadanonda iti detour road iti Barangay Lubong, Sta. Maria, dua a lalaki a nakasabatda iti dalan ti kellaat a nangpaltog kadakuada iti sumagmamano a daras a nakapuntaan iti makannigid a parte ti tengnged ken abaga ni Raposas.

Nagsagrap met ti baket nga Estrada a naggian iti likud ni Raposas, iti sugat iti makannigid a sakana idinto a nasugatan dagiti takiag ni Christian a naglugan iti sidecar.

Mapapati a cal. 45 ti naaramat iti pammaltog kas maibatay iti pito a kapsula ken maysa a deformed slug a narekobre iti nakapasamakan ti krimen.

Saan pay nga ammo ti motibo ti pammaltog.#