3 ginuyod ti alinuno, nalmes

STA. MARIA, Ilocos Sur – Tallo a tattao a pakaibilangan ti dua nga ama ti nalmes gapu iti panangsultop ida iti alinuno iti karayan sadiay Barangay Tinaan, ditoy nga ili idi agsapa ti Oktubre 19.

Nainaganan dagiti biktima a da Melchor Dosono y Acosta, 57, naasawaan; Francisco Cabotage y Orbiztondo, 38, naasawaan; ken ni Shawn Francis Cabotage y Dayap, 9, residenteda amin iti nadakamat a barangay.

Naammuan iti inbestigasion a sakbay ti insidente, tartarimaanen da Dosono ken Cabotage ti iketda iti igid ti karayan idinto nga adda iti ballasiw ti karayan nga agay-ay-ayam da Shawn, anak ni Cabotage ken ni Irene, 9, anak ni Dosono, partikular iti pagattumeng ti kaunegna nga agay-ayus a danum iti baba ti nadadael nga spillway.

Mapapati a binallasiw dagiti ubbing ti agay-ayus a danum nga aglawa iti uppat a metro a puon ti nakayanudanda.

Idi nakitada dagiti annakda a naiyanud, immarayat da Dosono ken Cabotage ngem mapapati a sinultop ida ti agal-alikuno a danum.

Immarayat dagiti nakasaksi iti napasamak ket nasalbarda ni Irene ken nasarakanda ni Dosono iti uneg ti danum kalpasan ti treinta minutos.

Naitaray ni Dosono iti Reyes Hospital ngem indeklara ti doktor a nangtaming kenkuana a dead on arrival.

Narekobre met dagiti nagresponde a nagtipon a kameng ti Philippine Coast Guard a nakabase iti Barangay Nalvo, ditoy met la nga ili, ken dagiti mangngalap ti bangkay ni Cabotage idi agarup 11:20 ti bigat iti dayta met la a petsa.

Kabigatanna, idi agarup 3:00 ti bigat ti Oktubre 20, nasarakan dagiti barangay tanod ti bangkay ni Shawn a tumtumpaw iti asideg ti nakalmesanna.#