3 granada, nasarakan iti makalkali a pagbasuraan

CABUGAO, Ilocos Sur – Tallo a granada ti nasarakan iti makalkali a pagbasuraan iti likudan ti balay ti maysa a residente iti Sitio Abquir, Barangay Dardarat, ditoy nga ili idi bigat ti Septiembre 9.

Iti panagimbestiga dagiti nagresponde a polis, naammuan a maysa a Warlito Sadac y Carbonnel, 42, naasawaan, mannalon, ti nakasalama kadagiti granada bayat ti panagkalina iti abut a pagbasuraan iti sirok ti mangga iti likudan ti balayna.

Aglatlati dagiti granada ken awananda iti safety lever/pins.

Dagus nga inreport ni Sadac ti nasarakanna ken ni Barangay Captain Danny Garcia ket intawag daytoy iti polis.

Naipan dagiti granada iti police station ditoy para iti umisu a disposision.#