3 gunglo dagiti mannalon, immawat iti farm machineries

CABUGAO, Ilocos Sur – Tallo nga asosasion dagiti mannalon ditoy nga ili ti immawat iti farm machineries manipud iti Department of Agriculture-Ilocos Norte Provincial Center, Batac City idi Hunio 6.

Immawat ti Pug-os Farmers’ Association nga indauluan ni Elmer G. Bromeo iti kuliglig a kumpleto dagiti aksesoriana; reaper ti naited iti Sisim Farmers’ Association nga indauluan ni Joselino  Carbonel; ken rice thresher ti naited iti Turod Farmers’ Associatioin nga indauluan ni Kagawad Edgardo Garcia, presidente ti asosasion.

Napaadda dagiti nasao a ramit-talon ken makinaria babaen ti Farm Mechanization Program ti DA ken iti pannakikammayet ti lokal a gobierno ditoy nga idadauluan ni Mayor Edgardo S. Cobangbang, Jr.

Iti daytoy a programa, masurot ti counterparting scheme no sadino nga ibaklay ti DA ti 85%  idinto a 15% ti ibaklay ti asosasion ken ti LGU.

Prioridad ti lokal a gobierno ditoy babaen ti opisina ni Mayor Cobangbang ti pannakaited dagiti kasapulan dagiti mannalon tapno mapadakkelda ti produksionda para iti pannakaidur-as ti ekonomia daytoy nga ili.#