SAN ILDEFONSO, Ilocos Sur – Tallo a kalding ti naireport a natakaw sadiay Barangay Busiing Cen-Sur ditoy nga ili a mapapati a naiwayat idi karabian ti Marso 8.

Inreport ni Marcelo Remular y Riego, 50, naasawaan, karpintero, ken residente iti nadakamat a barangay, a mapukpukaw ti kaldingna a suspetsana a ginuyod dagiti mannibrong idi rabii ti nadakamat a petsa

Segun ken ni Remular, inggalutna dagiti tallo a kaldingna iti likudan ti balayda idi alas 5:00 ti malem ti Marso 8 ngem idi ipanna koma iwayway iti kataltalonan iti kabigatanna, awanen dagitoy.

Sinapul ni Remular dagiti tarakenna amangan no nakagarutda ngem idi saanna ida a masapulan, inreportnan iti polis.

Agbalor dagiti kalding iti sumurok-kumurang P12,000.00.#