BANGUED, Abra – Kinarigat ti panagbiag iti kabambantayan ti kangrunaan a rason iti isusuko dagiti tallo a kameng ti New People’s Army itay nabiit.
Simmuko itay nabiit kadagiti opisial ti 41st Infantry Battalion a nakabase sadiay Tagudtod, Lagangilang, Abra da Rafael Gunday alias Ka Sonny, residente ti Kilong-ulaw, Boliney, Abra; Randy Sapongen alias Ka Allen, taga-Ampaliok, Luba, Abra; Antonio Pingian, alias Ka Anton, manipud Manabo, Abra; agpapada a kameng ti NPA.
Kinuna dagiti tallo a rebel-returnees nga adu a rigat ti napasaranda iti panaglemmengda ken pannakaanupda iti kabambantayan ken nakaro a bisin a sinagabada isu a nagdesisionda a simmuko iti gobierno.
Naited kadagiti tallo a rebel returnees ti agdagup iti P56,000 a kas cash assistance ken bayad dagiti insukoda nga igam.
Nabayadan iti P20,000 ti insuko ni Gunday nga springfield rifle; P16,000 ti gatad ti insuko ni Sapongen nga M16 armalite rifle; idinto a saan a nasinunuo ti gatad ti M14 ken M15 rifles nga insuko ni Pingian.
Segun pay kadagiti simmuko a rebelde, kinarigatda ti panagalis-alisda iti kampoda gapu iti kampania ti militar ken ti pannakirangetda no adda combat operation nga isayangkat dagiti government forces.
Kinunada a nakitada ti sinseridad ti gobierno a mangtulong kadakuada nga agsublin iti normal a klase ti panagbiag isu a simmukoda.#
