3 karpintero, nagudas iti nagsina nga aksidente

STO. DOMINGO, Ilocos Sur – Tallo a lallaki ti saanen a makaselebrar iti Paskua kalpasan a nagudasda iti nagsina nga aksidente ti lugan sadiay Sta. Maria ken ditoy nga ili itay lawasna.

Naireport a nagudas iti aksidente sadiay Sta. Maria idi sardam ti Disiembre 17 da Rogie Dela Cruz y Credo, 35, naasawaan; ken Michael Rafanan y Dizon, 40, naasawaan, agpada a karpintero ken residente iti Barangay Danuman East, Sta. Maria; idinto nga iti dayta met la a petsa idiay Sto. Domingo, natay met iti aksidente iti lugan ni Arnulfo Roc y Ascano, 47, karpintero, ken residente iti Barangay Naglaoa-an, Sto. Domingo, Ilocos Sur.

Naammuan iti blotter ti police station ti Sta. Maria nga agpaamianan ti Racal motorcycle a linuganan da Dela Cruz ken ni Rafanan idi napukaw ti drayber ti kontrolna iti manibela a puon ti panagekis ti lugan ken nangdungparanna iti poste ti elektrisidad ken nakatinnaganna iti maysa metro ti kaunegna nga abaga ti kalsada.

Nagsagrap dagiti dua iti grabe a dunor iti uloda a puon ti nakatayanda a dagus.

Kabayatanna, bayat ti panagdaliasat ti Rusi 125 a motorsiklona a minanehona, napukaw met ni Roc ti kontrolna iti manibela ket naikras iti lauden nga abaga ti kalsada a nagsagrapanda a naglugan kadagiti dunor iti ulo.

Naitaray dagiti dua iti Metro Vigan Cooperative Hospital ngem indeklara ti doktor a nangtaming kadakuada a dead on arrival.

Iti panagimbestiga dagiti polis, kagapgapu dagiti dua iti drinking spree idi mapasamak ti aksidente.#