3 lalaki, pakairamanan 1 a menor de edad, naaresto

BANTAY, Ilocos Sur – Iti sanguanan ti kampania ti kapolisan maikontra iti panagraira ti paltog ditoy probinsia, tallo a lalaki a pakairamanan ti maysa a menor de edad ti inaresto dagiti polis gapu iti panagikutda iti paltog.

Iti report a dimmanon iti provincial office ditoy, madama ti panagpatrolia ti polis ti Sta. Catalina iti alas 9:15 ti rabii ti Marso 21 idi nakaawatda iti pulong a maysa a nabartek a lalaki ti nagpaputok iti paltog iti Sitio Calaoan, Barangay Tamurong.

Idi simmangpet dagiti polis iti nadakamat a lugar, insuko ni Barangay Tanod Fortunato Raguindin Y Aquino ti cal. 32 nga addaan iti magasin a nagkarga iti maysa a bala ken maysa a kapsula nga inagawna ken ni Romulo Talania y Ignaci, 49, naasawaan. Innala dagiti polis ni Talania tapno mapalutpot iti police station.

Dua pay a nagsina nga insidente a nakainbolbaran iti paltog ti naireport idi rabii ti Marso 19 iti Sta. Cruz.

Iti immuna nga insidente, pinasardeng dagiti polis ni John Christian Dalilis Y Jacusalem, 15, estudiante, iti checkpoint iti national highway iti sanguanan ti public market idi agarup alas 11:05 ti rabii ti Marso 16.gapu ta awan headlight ti motorsiklona a  TMX 155.

Iti panagsukimat dagiti polis, naduktalanda ti maysa nga improvised a Magnum 22 nga addaan iti 2 a magasin a naglaon iti 7 a bala.

Naipilan ti kaso a panaglabsing iti RA 8294 maikontra ken ni Dalilis.

Kabayatanna, inaresto dagiti polis ni Alex Reyes y Castro, 35, baro, barangay tanod, residente iti Barangay Sagat, Sta. Cruz, gapu iti pannakapaltog ni Jun Javillonar, kalugaranna.

Segun iti report, mapapati a kinompronta da Reyes ken ni Nilo Javonillo, chief tanod, ni Nomi Javillonar y Isla, 41, naasawaan, laborer a nagtungpal iti panagringgor da Reyes ken Javonillo ken nakadunoran ti baba ti makinkannigid a mata ti tanod.

Naggawid ni Reyes sa nagsubli nga addan iggemna a homemade gauge 12 shotgun ket nagpaputok a nakasugatan ti makannawan a saka ni Javillonar.

Naganawa ni Barangay Kagawad Fernando Javonillo sana inagaw ti armas ni Reyes.

Iti pannakaisurat daytoy, maisagsaganan ti kaso nga illegal discharge of firearm and grave threat maikontra ken ni Reyes.#