MAGSINGAL, Ilocos Sur – Tallo a lallaki ti natiliwan nga adda ikutda a paltog iti checkpoint nga impasdek dagiti polis ditoy nga ili.
Nabigbig dagiti armado a lallaki a da Dionisio Patron, 45; Rosendo Pilar, 34; ken Ernesto Patron, agpapada a residente iti Barangay Ora Este, Bantay, Ilocos Sur.
Segun iti report, nakita dagiti polis a mangiwaywayat iti checkpoint iti sanguanan ti municipal hall ditoy nga ili dagiti tallo a suspek a mapagsuspetsaan ti tignayda ket kinapkapanda dagitoy a nakakumpiskaanda iti saggaysada a kal. 45.
Iti pannakaisurat daytoy, maisagsaganan ti kaso a panaglabsing iti election gun ban maikontra kadagiti tallo a suspek.#