3 lugan nainbolbar iti aksidente, 1 natay, 3 nasugatan

STA. LUCIA, Ilocos Sur – Natay ti maysa a maestro idinto a tallo ti nasugatan iti aksidente a nakainbolbaran pay ti dua a traysikel iti national highway a sakup ti Barangay Sabuanan, ditoy nga ili idi agsapa ti Nobiembre 23.

Naideklara a dead on arrival iti Sta. Lucia District Hospital ti nagmaneho iti Honda motorcycle ni Ace Villanueva y Silapan, 26, baro, mangisursuro iti NICOSAT Colleges, Candon City ken residente iti Barangay Mantanas, Sta. Cruz, Ilocos Sur idinto a naitaray iti Resonable Hospital, Candon City ti nagmaneho iti sabali a Honda TMX 155 tricycle a ni Mark Ryan Taclawan y Miguel, 39, naasawaan, mannalon, ken ti asawana a ni Elsa, 39, maestra iti Teodoro Hernaez National High School, agpada a residente iti Barangay Caburao, Santiago, Ilocos Sur.

Nagsagrap laeng iti minor injuries iti saka ken ima ti nagmaneho iti Honda TMX 155 tricycle a ni Nestor Gamueda y Ramirez, 25, naasawaan ken residente iti Brgy Calaoa-an, Candon City, Ilocos Sur.

Kas maibatay iti report, agsarsaruno nga agpaamianan a direksion ti traysikel a minaneho ni Taclawan ken ti motorsiklo ni Villanueva ket idi dimtengda iti nakapasamakan ti aksidente, mapapati a kellaat a nagobertek ti motorsiklo ngem nasapgidna ti kutit ti traysikel a puon ti pannakapukaw ni Villanueva iti kontrolna iti manibela ken nakakaruskosanna iti kalsada.

Ditoy met a dinungpar ti traysikel ni Gamueda a naggapu iti kasungani a direksion ti biktima a puon ti pannakatinnag ni Gamueda iti laud nga abaga ti kalsada.

Nagsagrap ni Villanueva kadagiti dunor iti nadumaduma a paset ti bagina ket naideklara a DOA iti Sta. Lucia District Hospital a nakaitarayanna.#