3 lugan nainbolbar iti aksidente, 2 natay

SAN JUAN, Ilocos Sur – Dua a motorista ti natay iti aksidente a nakainbolbaran ti dua a motorsiklo ken maysa a trailer truck iti national highway ti Barangay Lapting ditoy nga ili idi rabii ti Hunio 14, 2014.

Dead on the spot ni Lindell Villon y Antonio, 19, baro, residente iti Barangay Lapting, idinto a naideklara a dead on arrival idi maidanon iti Pira Clinic and Hospital a nakaitarayanna kalpasan ti aksidente ni Daryl Valledor y Savellano, 22, baro, residente met laeng iti nadakamat a barangay.

Nakaro a nasugatan ni Dennis Urbayo y Rafanan, 32, naasawaan, konduktor iti minibus, ken residente iti Barangay Baliw, San Juan, Ilocos Sur.

Tinarayan ti drayber ti Isuzu tractor head truck a ni Vincent Baltazar y Agustin, 28, naasawaan, ken residente iti Barangay 6 Tonoton, Piddig, Ilocos Norte, dagiti biktima ngem napasardeng ti luganna iti checkpoint nga impasdek dagiti polis ti Sinait kalpasan a nakaawatda iti flash alarm manipud iti polis-San Juan.

Segun iti pakauna nga inbestigasion, agpaabagatan a direksion ti Honda Dio scooter a minaneho ni Urbayo idinto a kasabatna ti Suzuki Raider R150 motorcycle a minaneho ni Valledor a sumarsaruno iti Isuzu tractor head truck a minaneho ni Baltazar ket mapapati nga inobertekan ti Suzuki Raider ti truck ngem aksidente a nasapgidna ti sumungad a Honda scooter.

Kas resulta, naikras ti Honda scooter iti liniana idinto a naikras met ti Suzuki Raider agraman dagiti dua a nagsakay iti sango ti truck a nakaigapu iti pannakaatalda.

Kalpasan a naammuan dagiti nagresponde a polis manipud kadagiti nakaimatang iti aksidente nga adda trailer truck a nainbolbar, dinagdagusda a pinakaammuan dagiti kaparangetda a police stations a nagtungpal iti pannakapasardeng ti nasao a truck iti Sinait, Ilocos Sur.

Iti insayangkat dagiti polis nga ocular inspection iti nasao a behikulo, nakumpirmaran a nainbolbar daytoy iti aksidente gapu iti kaadda dagiti dara ken mantsa iti pilid ken fender daytoy.

Impaima dagiti polis-Sinait ti drayber agraman iti truck kadagiti polis-San Juan para iti naan-anay nga inbestigasion ken dokumentasion.#