3 lugan, nainbolbar iti aksidente, maysa ti natay

MAGSINGAL, Ilocos Sur – Tallo a lugan ti nainbolbar iti aksidente iti national highway a sakup ti Barangay Bungro ditoy nga ili idi rabii ti Agosto 9 a nakatayan ti maysa a motorista.

Dagus a natay ni Benthony Uclos y Flores, 20, baro, ken residente iti Barangay Miramar, ditoy nga ili kalpasan a dinungpar ti maysa a kotse ken maysa a bus iti sanguanan ti Beda’s Piggery Farm, sadiay Barangay Bungro idi agarup 9:00 ti rabii ti nadakamat a petsa.

Iti panagimbestiga ti polis-Magsingal, agpaamianan a direksion ti Yamaha Mio motorcycle a minaneho ni Uclos, sumarsaruno ti Chevrolet car sedan a minaneho ni Primo Jay Ramos y Salvador, 52, barangay captain, ken residente iti Barangay 23, Laoag City, Ilocos Norte, ket idi makadanonda iti nakapasamakan ti aksidente, mapapati a kellaat a nagpakannigid ti Yamaha Mio a puon ti nakadungparan kenkuana ti sumarsaruno a kotse.

Gapu iti pigsa ti pannungpar, naipalladaw ni Uclos iti akinlaud a linia ti national highway a nakadungparan kenkuana ti sumungad a Florida Bus a minaneho ni Tomas Quilon y Tangonan, Jr. 43, ken residente iti Ruiz Street, Barangay Canaan, Badoc, Ilocos Norte.

Segun iti polis, dagus a natay ni Uclos gapu kadagiti grabe a sugatna maigapu iti pannakadungparna kadagiti dua a lugan.

Saan a naan-ano dagiti nagmaneho iti kotse ken iti bus nupay nagsagrap iti dadael dagiti luganda.

Personal a napan ti inreport ti drayber ti bus ti insidente iti Magsingal police station sa boluntario a simmuko.

Ngem naireport a saanen nga agdarum pay ni Nestor Uclos y Pagud, ama ti biktima, kalpasan nga immannugot da Ramos ken Quilon a mangtedda iti kantidad para iti pannakaipumpon ni Uclos.

Kabayatanna, saan metten a dimmanon pay iti korte ti kaso mainaig iti aksidente a napasamak sadiay Barangay Cadanglaan, Banayoyo, Ilocos Sur idi rabii ti Agosto 11 a nakainbolbaran ti dua a kotse ken maysa a traysikel, kalpasan a nagaareglo dagiti tallo a partido iti police station.

Maipalagip a dinungpar ti Isuzu Crosswind a minaneho ni Ashley Roger Gacusan y Garnace, 31, baro, mannalon, ken residente iti Barangay Lintic, Banayoyo, Ilocos Sur, ti maysa a Honda TMX tricycle a kukua ni Victor Domingo y Danao, 40, baro, ken residente iti Barangay Caburao, Santiago, Ilocos Sur, ken maysa a Toyota Corolla a kukua ni Jaylord Gacusana, residente iti Barangay Cadanglaan, Banayoyo, Ilocos Sur iti aksidente a napasamak iti Barangay Cadanglaan, Banayoyo, Ilocos Sur idi agarup 9:30 ti rabii ti Agosto 11.

Segun iti inbestigasion, agpaamianan a direksion ti Crosswind ket iti lugar a nakapasamakan ti aksidente, mapapati a kinabig ni Gacusan ti manibela tapno liklikanna ti maysa a di nabigbig a lugan a makasabatna ket aksidente a nadungparna ti Honda TMX tricydle a nakaparking iti abaga ti kalsada.

Mapapati a nagpakannigid ti Crosswind ket nasapgidna ti Toyota Corolla a nakaparking iti sanguanan ti balay ni Gacusana.

Saan a naan-ano da Gacusan ken ti pasaherona a maysa a Domingo Garnace ngem naipanda latta iti Candon General Hospital para iti medical ken alcoholic breath examination.

Nupay kasta, immannugot dagiti biktima iti nasao nga aksidente a saanen a dumanon pay ti kaso iti korte kalpasan nga inako ni Gacusan amin a magasto iti pannakatarimaan dagiti nadadael a lugan.#