SANTIAGO, Ilocos Sur – Tallo a mangngalap ti natiliwan iti akto nga agkalkalap babaen ti kompresor iti kabaybayan a sakup ti Barangay Ambucao ditoy nga ili itay lawasna.

Natiliw da Jefie Daproza, Shery Boy Daproza ken Gideon Daproza, agpapada a residente iti Lingsat, Santa Maria, Ilocos Sur babaen ti tawag ni Barangay Captain Ruben Agosto iti polis a nangipakaammuanna iti kaadda dagitoy nga agkalkalap babaen ti compressor iti sakup ti Barangay Ambucao.

Nakumpiska manipud kadakuada ti tallo a  waterproof flashlight, 1 a signal light, 1 a bilog, 2 a googles, 1 compressor tanks ken 2 a pana.

Napalubosan met laeng dagiti mangngalap kalpasan a nagbayadda iti multada.

Iti kallabes, adda dagiti matiltiliw nga agkalkalap iti illegal a wagas iti kabaybayan daytoy nga ili ket kaadduanna ti taga-Lingsat, Sta. Maria.#