3 mangngalap, natiliw agiwaywayat illegal fishing

CABUGAO, Ilocos Sur – Taga-Sinait dagiti umar-arog iti kabaybayan ditoy nga ili tapno agiwayatda iti illegal a panagkalap.
Daytoy ti napatalgedan dagiti otoridad kalpasan a tallo a mangngalap a taga-Sabangan, Sinait, Ilocos Sur ti natiliwan nga agkalkalap babaen iti illegal a wagas iti kabaybayan a sakup ti Barangay Pug-os ditoy nga ili.

Nabigbig dagiti natiliw a mangngalap a da Arvin Rabanal y Navarro, 37, baro, Bong Navarro y Molina; 42, naasawaan; ken Romeo Pajo y Dangcil, 44, naasawaan, residenteda amin iti Barangay Sabangan, Sinait, Ilocos Sur.

Malaksid iti motorized boat, nakakumpiska dagiti otoridad a pakaibilangan ti Maritime police, Bantay Dagat, ken opisial ti barangay, iti maysa a compressor iti ikut dagiti suspek.

Nagresponde dagiti nagtitipon nga elemento ti Cabugao Police Station, Maritime police, Bantay Dagat, ken ni Barangay Kagawad Amado Belen, babaen ti pannakikoordinar ti 103rd Maritime Police a nakabase iti Barangay Mindoro, Vigan City a nangipakaammo iti kaadda iti maisaysayangkat nga illegal a panagkalap iti kabaybayan a sakup ti Barangay Pug-os, Cabugao.

Pinadas dagiti suspek ti aglibas ngem naipiskot ida dagiti otoridad.

Naipaima dagiti tallo a suspek iti maritime police para iti pannakaimbestigada ken umisu a disposision.#