3 mangngalap, natiliwan iti bongbong

MAGSINGAL, Ilocos Sur – Iti baet ti nainget a kampania maikontra iti illegal a panagkalap iti probinsia, tallo manen a mangngalap iti barangay Miramar ditoy nga ili ti natiliwan dagiti polis nga adda bongbongda idi bigat ti Nobiembre 17.

Nasukalan iti ikut ni Efren Salvador y Uclos, 37, naasawaan, ti tallo nga underwater explosive device (bongbong) a naikabil iti plastic water jag idinto nga uppat a botelia ti bongbong ti nakitada a naikabil iti lata ti biskuit iti ikut dagiti agkabsat a Faustino Pagay y Banadero, 26, baro, ken Primo Pagay y Bandero, 29.

Naipan dagiti tallo a mangngalap agraman dagiti nakumpiska kadakuada a bongbong iti police station.

Nangisayangkat dagiti polis ditoy iti panagsiim iti igid ti baybay ti nasao a barangay gapu kadagiti report a pannakaisaysayangkat ti panagbongbong iti daytoy a coastal barangay.#