3 mangngalap, natiliwan nga agbongbongbong

SINAIT, Ilocos Sur – Tallo a mangngalap ti natiliwan nga agisaysayangkat iti panagbongbong iti kabaybayan a sakup ti Barangay Katipunan ditoy nga ili idi rabii ti Oktubre 24.

Nainaganan dagiti mangngalap a da Danny Lacuesta y Barbosa, 36, naasawaan; Eduardo Yagyagan y Guzman, 20, baro; ken Adrian Ines y Raras, 18, baro; agpapada a residente iti Barangay Teppeng, ditoy met laeng nga ili.

Nangisayangkat dagiti elemento ti Maritime Police Station nga indauluan ni OIC SPO4 Rommel A. Lazaga ken maysa a civilian asset iti seaborne patrol operation iti kabaybayan ti Barangay Katipunan idi 10:20 ti rabii ti nadakamat a petsa gapu kadagiti naawatda a report ti panagbongbong iti nasao a lugar.

Nasalamaan dagiti polis dagiti tallo nga agiwaywayat iti panagbongbong a nakalugan iti awan numerona a motorized banca.

Nakumpiska dagiti polis iti ikut dagiti tallo ti lima a botelia ti bongbong, uppat a 4 x 4 ken maysa a botelia ti arak, 5 nga underwater flashlights, 2 a maskara, 3 a kayo nga spear guns, 4 nga scoop nets, maysa a pagsilawan a Petromax, ken sumurok kumurang a dua a kilos a nadumaduma ti klasena nga ikan nga agpateg iti P180.00.

Adda metten iti kustodia dagiti maritime police ti bangka nga inusar dagiti mangngalap.

Iti pannakaisurat daytoy, naipaiman ti kaso iti opisina ti provincial prosecutor iti Vigan City.#