3 mannanakaw, nagpullo

VIGAN CITY – Nagballigi dagitoy a mannibrong a nagtakaw iti maysa a pagtagilakuan ditoy siudad ngem nagsublida iti kabigatanna tapno takawanda manen daytoy. Iti daytoy a gundaway, nagpulloda ta natiliwanda bayat ti akto a panagtakawda ket sigurado panagkakasoda ken posible a pannakaibaludda.

Naipaiman iti city prosecutor’s office ti kaso a theft maikontra kada Myra Bacani y Dela Cruz, 25, balo ken residente iti Barangay 130 Dagupan City, ken dagiti dua a kumplotna a da Imelda Binairis y Gonzales, 46, naasawaan, ken residente iti Peria Road, Diliman, Quezon City ken  Greg Dela Cruz Castro, 26, naasawaan, ken residente iti Barangay Carangalan, Dagupan City.

Iti panagimbestiga dagiti polis, idi agarup alas 7:30 ti rabii ti Pebrero 18, innem a tattao ti napan iti Mercury Drug Store ket nagpammarangda a kustomer.

Iti laksid ti pannakaammo dagiti mannibrong, natiliw ida ti CCTV camera ti nasao a pagtagilakuan iti akto a nagkurimes iti siam a lata ti Pediasure Milk (900 grams), maysa a lata ti Anlene Milk, (1 kg.), maysa a Nestogen Milk (900 grams) 3 boxes ti Jimms (20 pieces per box) ken 4 pedaso ti Quadros Wafer nga aggatad amin iti sumurok kumurang P15,000.00.

Ngem nakapuslit dagiti suspek a saan a nadnadlaw dagiti aglaklako.

Kabigatanna, idi agarup 9:00 ti bigat, nagsubli manen ti tallo kadagitoy iti Mercury Drug Store ket nagpammarangda manen a kustomer.

Ngem iti daytoy a gundaway, akto a natiliwan ti suspek a ni Bacani bayat ti panangisakibotna iti short pantsna ti maysa a box ti Jimms Coffee nga agbalor iti P250.00  idinto a nagpaay dagiti kaduana a look-out nga agsipsiput iti nasao a drug store.

Dagus nga inaresto ida ti assistant manager ken dagiti empleado ti pagtagilakuan ket narekobreda ti tinakaw ni Bacani.

Iti pannakaisurat daytoy, adda iti kustodia ti Vigan City police station dagiti suspek bayat ti pannakaipila ti maikanatad a kaso maikontra kadakuada.#