3 menor de edad masuspetsa a drug pushers, naipaima iti DSWD

CANDON CITY – Naipaima iti opisina ti Department of Social Welfare and Development ditoy siudad ti tallo a menor de edad a mapapati nga aglaklako iti napagango a marihuana buds.

Nainaganan dagiti menor de edad a da Nizer Pangisban y Gabin, 15, ken residente iti Barangay Paltok, San Emilio, Ilocos Sur, Morris Sayoet y Bulagao, 15, dropped out; ken Norvin Norbete y Binas, 17, agpapada a residente iti San Emilio, Ilocos Sur,

Maipalagip a pinasardeng dagiti polis ti nalabaga a Honda XRM a minaneho ni Pangisban iti sanguanan ti tiendaan public ditoy siudad para iti pannakainspeksion ti luganna.

Ngem nalasin ti guardia ti public market ni Pangisban a maysa kadagiti sinitarna iti uneg tiendaan publiko gapu iti suspetsoso a tignayda iti awan matatao a paset ti maikatlo a kadsaaran ti tiendaan. Mapapati nga inyawat ti grupo ti maysa a  plastic bag sada nagtataray nga immadayo.

Naduktalan ti guardia a nagkarga ti bag iti napagango a  marihuana buds nga agdagsen iti 21.5 grams a mapattapatta nga agbalor iti P535.

Kabayatanna, dua a lalaki ti nakasuan iti panaglabsing iti RA 9165 kalpasan ti buy bust operation nga insayangkat ti polis ditoy maikontra kadakuada.

Nakasuan da Fernando Garringo Jr. y Tabuso, 39, naasawaan ken residente iti Barangay Amguid, ditoy ken ni Napoleon Jimenez y Vicente, 25, baro ken residente iti Barangay Paypayad ditoy met laeng siudad iti panaglabsing iti R.A. 9165 wenno Comprehensive Drugs Act of  2002 ket nai-docket ti kaso iti opisina ti city prosecutor ditoy.

Nangisayangkat iti buy-bust operation dagiti polis-Candon nga indauluan ni Police Supt. Marlo A. Castillo, hepe ti polis, ken babaen ti koordinasion ti PDEA-ISSET, idi agarup alas 10 ti aldaw ti Abril 24  iti Barangay Amguid a nagtungpal iti pannakakumpiska iti ikut ni Garringo  ti 107 grams a napagango a marihuana nga addaan busel nga agpateg iti P5,885.00

Naala pay iti ikut ti suspek ti P500 marked money nga inaramat dagiti polis iti operasion.#