3 menor de edad, naapput bayat panagtakawda iti selpon

SINAIT, Ilocos Sur – Tallo a menor de edad ti inaresto dagiti polis ditoy kalpasan a natiliwan ida ti guardia iti akto a panagtakawda iti maysa a paglakuan iti selpon iti public market ditoy idi pasado tengnga ti rabii ti Disiembre 15.

Segun iti report manipud iti polis ditoy, naapput ni Leo Gaspi y Sarmiento, 58, security guard ti public market, dagiti tallo a menor de edad bayat ti panagtakawda iti uneg ti tienda ti selpon ken accessories a kukua ni Omar Tumawis y Obien, 47, naasawaan, natibo ti Lilod Madaya, Marawi City, ken agdama nga agnaed iti Barangay Macabiag ditoy nga ili.

Naduktalan ni Gaspi ti panagtakaw bayat ti panagpatroliana gapu ta nasukalanna a naporsar a nalukatan ti maysa kadagiti stall iti tiendaan ken nakitana dagiti tallo a menor de edad iti uneg ti pagtagilakuan nga agkurkurimes kadagiti tagilako.

Kinapkapan ni Gaspi dagiti menor de edad ngem nakalibas ti maysa a nabigbig idi agangay a ni Arnel (parbo a nagan agsipud ta menor de edad).

Narekobre kadagiti suspek iti tallo a cellphone batteries, maysa a relo, ken maysa a card reader kadagiti suspek.

Iti insayangkat ti akinkukua nga inbentario, naduktalan a mapukpukaw pay ti tallo a cellular phone ken assorted head sets a mapattapatta nga agpateg amin iti P10,000.00.

Naipan dagiti suspek iti police station para iti pannakapalutpotda ken umisu a disposision idinto a napakaammuan dagiti nagannak kadakuada ken ti municipal social welfare officer para iti pannakaikustodia dagitoy kenkuana agsipud ta menor de edadda.#