STA. MARIA, Ilocos Sur – Dua lawas pay laeng ti tawen 2014, nagsasaruno dagiti naireport a panagtakaw iti motorsiklo sadiay Caoayan, Cabugao ken ditoy nga ili a maysa pay met a menor de edad ti maysa kadagiti naitudo a suspek.
Idi agarup 10:45 ti bigat, nagreport iti polis ni Vicente Lolong y Manubay, 45, naasawaan, manedier ti Choey’s Bakery, natibo iti Occidental Mindoro ngem agdama nga aggigian iti Barangay Baliw Laud ditoy nga ili a natakaw ti Honda Wave a motorsiklona nga imparkingna idi agarup alas 7:00 ti agsapa iti sango ti bakery a masarakan iti makannawan nga abaga ti national highway.
Iti panagimbestiga dagiti polis, idi agarup 10:00 ti bigat iti dayta a petsa, nakita ni William Dasalla y Garcia, 20, naasawaan, katulongan iti vulcanizing shop ken residente iti Barangay Baliw Laud, ti dua a lalaki a nangsakay iti nasao a motorsiklo.
Nangiwayat dagiti polis iti pursuit operation sada pinakaammuan dagiti kabangibang a police stations maipanggep iti nasao nga insidente.
Maysa met a nangisit a Rusi motorcycle ti natakaw iti Barangay Anonang Mayor, Caoayan idi malem ti Enero 14.
Segun ken ni Orlando Quitoriano y Navarro, 45, naasawaan, ken residente iti nasao a barangay, tinakaw ti maysa a Teodorico Alcantara, taga-Barangay Nagsangalan, Vigan City ti motorsiklona nga imparkingna iti uneg ti balayda.
Naammuan iti panagimbestiga dagiti polis nga idi agarup alas dose ti tengnga ti aldaw iti dayta a petsa, napan ni Alcantara iti balay ti biktima tapno gumatang iti para tadi a manok.
Idi awan a makita ti suspek ni Quitoriano, imbaga ti suspek ken ni Jayvee, 13, a sublatenna ti motorsiklo ti ama daytoy a mapan mangala iti karton a pangikabilanna iti manok.
Inyawat ti barito ti tulbek ti motorsiklo sa nagkalubbon ken ni Alcantara a rimmuar iti balayda.
Idi addadan iti Barangay Naguilian, indissaag ni Alcantara ti barito sana pinakayaskas ti motorsiklo a nagturong iti daya a direksion.
Iti pannakaisurat daytoy, di pay ammo no ania ti simrek iti utek ni Alcantara ta intarayna lattan ti motorsiklo ni Quitoriano.
Kabayatanna, tiniliw dagiti polis ti maysa a menor de edad, maysa nga estudiante nga adda iti maudi a tukad iti Sinait National High School ken residente iti Barangay Cabangtalan, Sinait a naitudo a nangtakaw iti maysa a motorsiklo a naiparking iti sanguanan ti Suero General Hospital idi agsapa ti Enero 14.
Nagreport iti polis ni Glenford Villanueva y Rabang, 42, naasawaan, security guard ti Suero General Hospital a natakaw ti Euro 150 motorcycle a kukua ni Carlo Braceros y Siruno, 23, baro, ken residente iti Barangay Sisim, Cabugao a pinanawanna iti parking area iti sanguanan ti nasao nga ospital.
Natuntonan dagiti polis ti motorsiklo sadiay Barangay Teppeng, Sinait babaen ti maysa a tip manipud iti Barangay Intelligence Network.
Dagus a nangisayangkat operasion ti nagtipon nga elemento ti Cabugao ken Sinait police stations iti panangidaulo da Police Chief Inspector William Nerona ken Police Chief Inspector Greg Guerrero a nagtungpal iti pannakapasubli ti natakaw a motorsiklo ken pannakatiliw ti nagtakaw a menor de edad.
Iti pannakaisurat daytoy, naisublin ti motorsiklo iti akinkukua idinto a naipaiman ti suspek iti DSWD bayat a maisagsaganan ti pannakaipila ti maikanatad a kaso maikontra kenkuana.#