3 motorsiklo, natakaw

STA. CATALINA, Ilocos Sur – Agraira manen ti panagtakawan iti motorsiklo iti Metro Vigan kas maibasar iti report a tallo manen ti napukawan iti luganda iti umuna nga uppat nga aldaw daytoy a bulan.

Nagreport iti polis ni Carlo Bergonio y Pardon, 18, estudiante, ken residente iti Barangay Lingsat, Bantay, Ilocos Sur a natakaw iti nakaiparkinganna ti sinublatna a  Honda Wave a motorsiklo ti kabsatna a ni Henry Bergonio bayat a nakaparking iti shoreline ti Barangay Paratong, Sta. Catalina idi agarup 6:20 ti malem ti Marso 1.

Saan a nakakandado nga imparking ni Bergonio ti motorsiklo iti nasao a lugar idi agarup 5:00 ti malem ket idi agsubli tallupulo a minutos kalpasanna, awanen daytoy.

Nagsawar dagiti polis ken nagipatulodda pay iti flash alarm kadagiti kabangibangda a police stations ngem negatibo ti resultada.

Naduktalan met a natakaw ti black Mio Sporty motorcycle ni Pitche Ablog y Adversalo, 28, balasang, empleada iti National Statistics Office ken residente iti Barangay Mindoro, Vigan City idi agarup 5:10 ti malem ti Marso 1.

Segun ken ni Ablog, imparkingna ti luganna iti sanguanan ti NSO building iti alas 8:00 ti bigat ti nadakamat nga aldaw.

Idi 1:30 ti malem, sinublat ni Jay-R Paroligan y Frando, 21, baro, ken residente iti Barangay San Jose, Vigan City, ken kaempleado ni Ablog iti opisina ti motorsiklo ti balasang sana insubli nga imparking met la iti dati a lugarna idi agarup 2:00 p.m.

Idi aggawiddan iti agarup 5:00 p.m., naduktalan laengen ni Ablog nga awanen ti luganna.

Nagsawar dagiti polis Vigan ngem saanda a nasapulan ti motorsiklo.

Nangipatulod dagiti polis iti flash alarm kadagiti kabangibangda a police stations para iti pannakakemmeg dagiti suspek ngem awan ti banagna.

Idi met agarup 9 p.m. ti rabii ti Marso 4, imparking ni Benjie Luobo Bigornia y Tabling, 20, baro, ti Suzuki Rider a motorsiklona iti sanguanan ti kasera sadiay Barangay Tamag, Vigan City sa napan iti kuartona para iti personal a kasapulan, ngem idi agsubli kalpasan ti sumagmamano a minutos, awanen daytoy iti nangiparkinganna.

Sinapul ni BIgornia ti motorsiklo ket idi dina makita, inreportna iti polis.#