3 Muslim napaltogan gapu iti riri iti relief goods

CANDON CITY – Gapu ta saan a karaman ti nagan ti anakna iti listaan dagiti nawarasan iti relief goods a tulong ti gobierno kadagiti biktima ti bagyo, naglidem ti panunot daytoy suspek ket pinaltoganna ti mangimaton ken dua a sabali pay iti mismo a compound dagiti Muslim idi malem ti Agosto 27.

Naitaray iti Resonable Hospital para iti pannakaagas dagiti sugatda da Zoraida Marao y Nain, 50, balo; Sowaib Alamada y Natangcopan, 26, naasawaan, aglaklako; ken Johary Alamada y Natangcopan, 28, naasawaan, aglaklako; agpapadada amin a residente iti Barangay San Jose, Candon City.

Nabigbig ti suspek a ni Wahab Ampaso y Dimaro, 45, naasawaan, aglaklako, natibo iti Barangay Marinaot, Marawi City, Mindanao.

Naglak-am ni Marao iti sugat iti makannawan a luppona; ni Johary Alamada iti makannigid nga index finger; ken ni Sowaib Alamada iti makannawan a patongna.

Iti inisial a panagimbestiga dagiti polis, nagringgor da Wahab ken ni Juliet Alamada y Lupio agsipud ta saan a nairaman ti nagan ti anak ni Wahab iti listaan dagiti mabunongan iti relief goods a tulong kadagiti biktima iti bagyo.

Ni Juliet ti nangimaton iti pannakaiwaras dagiti relief goods kadagiti biktima ti bagyo.

Idi addadan iti compound, mapapati a pinadas ni Juliet nga ikkan iti kuarta ni Wahab ngem saan nga inawat ti naud-udi.

Kalpasan ti sumagmamano a minutos, nagsubli ni Wahab a nagtagiarmas ket pinaltoganna dagiti biktima a puon ti nakasugatanda.

Pinadas ni Wahab ti aglibas kalpasan ti pammaltog ngem kinamat dagiti nagresponde a polis agingga iti naipiskotda sada inaresto ken kinumpiska ti ikut daytoy a cal. 45 Colt a nagkarga iti dua a bala.

Nakarekobre pay dagiti polis iti 3 a kapsula manipud iti cal. 45 iti nakapasamakan ti pammaltog.

Naikustodia ti suspek iti police station ditoy para iti umisu a disposision idinto nga agtultuloy ti inbestigasion mainaig iti nasao nga insidente.#