3 naaresto gapu iti panagikutda iti paltog

CANDON CITY -Tallo a lallaki ti inaresto dagiti polis gapu iti panagikutda iti paltog iti nagsisina nga insidente a napasamak ti Sta. Maria, Bantay ken ditoy nga ili.

Nainaganan dagiti naaresto a da Carlito Escobar Vitales, 56, naasawaan ken residente iti Barangay Ambugat, Burgos, Ilocos Sur; Rogelio Unana y Carmelo, 21, naasawaan, ken residente iti Barangay Pus-pus, Bantay; ken Litorson Gapate y Gabatila, 26, baro, ken residente iti Barangay Sacaang, Galimuyod, Ilocos Sur.

Idi agarup alas 10:43 ti rabii ti Disiembre 3, inaresto da SPO4 Reynaldo Castro ken PO1 Noel Cariaga ni Escobar iti sanguanan ti maysa a tienda iti Barangay Poblacion, Sta. Maria, Ilocos Sur, idi nasiputanda nga adda nakasakbit a paltog iti siketna.

Kinumpiska dagiti polis ti cal .45 a paltog ni Escobar nga addaan magazine assembly a nagkarga iti 6 a bala idi awan maipakitana a permit to carry firearm outside residence (PTCFOR) nupay adda impresentana a lisensiana.

Naaresto met ni Unana iti maysa a checkpoint nga impasdek dagiti polis Vigan iti Quirino Boulevard, Barangay II, Vigan City idi agarup 11:15 ti aldaw ti Disiembre 24.

Pinasardeng da PO1 Emerson Nunez ken PO1 Rommel Rabago iti checkpoint ti motorsiklo a minaneho ni Unana, kalubbonna ni Joemar Alexander sada pinairuar ti lisensiana.

Idi linuktan ni Unana ti compartment ti motorsiklona, nakita dagiti polis ti maysa a homemade cal. 22 nga awanan iti bala ken markings.

Napilaanen ni Unana iti kaso a panaglabsing iti RA 8294 iti City Prosecutorā€™s Office, Vigan City.

Kabayatanna, impaima ti maysa a Pfc. Gonzaga iti Candon Police Staton ni Gapate idi malem ti Disiembre 25 gapu iti panangpaturongna iti paltog ti kinainumanna.

Segun iti report, nagginom da Gapate ken maysa a Jay-ar Magbuo, 25, baro ken agnaed iti Barangay Ayudante, Candon City, iti boarding house ti naudi ket bayat ti panaginomda, naparnuay ti nabara a panagsinnungbatda.

Mapapati a binunot ni Gapate ti paltogna sana pinaturongan ni Magbuo. Nagtaray ni GapateĀ  a nagpakalsada sa limmugan iti traysikel ngem nadlawan dagiti polis ti Candon nga agpatpatrolia ket sinurotda.

Dimsaag ni Gapate sa kasla awan aniaman a nagturong iti asideg ti DPWH compound ket mapapati nga adda impuruakna.

Sinawar dagiti polis ngem dida nakita agingga nga adda impaima ti maysa a guardia a cal. 38 a nagkarga iti lima a bala a mapapati a kukua ni Gapate.

Addan ti nasao a paltog iti kustodia dagiti polis Candon.#