3 naaresto gapu ta natiliwanda iti droga

CERVANTES, Ilocos Sur – Tallo a lalaki ti natiliwan iti droga iti tallo nga aldaw a nagsisina nga operasion dagiti polis iti Cervantes, Cabugao ken ditoy siudad manipud Oktubre 22 agingga iti 23.

Idi agarup 10:53 ti bigat ti Oktubre 22, natiliw iti buy-bust operation sadiay Barangay Concepcion ni Nestor aka “Kat-teng/Carter” Capacap y Gracia, 35, naasawaan, tricycle driver, ken residente iti Barangay Rosario, ditoy nga ili babaen dagiti polis ti Cervantes ken R.A., RID, PRO1.

Nakumpiska iti ikut ni Capacap ti tallo a heat sealed plastic sachet a nagkarga iti mapapati a shabu, dua a P1,000.00 a marked money, kuarta iti nagduduma a denominasion nga agdagup amin iti P533.00, dadael a lighter, maysa a narolio a foil; nangisit a Nokia cellphone model 1280; syringe needle; bassit a plastic box ken improvised tooter a na-assembled iti lima a pedaso (MC bulb, foil ken test tube), ken Honda TMX motorcycle.

Timmulong a nagrikisa da Barangay Captain Elmer Galula ken Kagawad Cyrill Nacis ken sinaksian da Lionel Jado, Clerk of Court ti Municipal Circuit Trial Court iti nasao a munisipio ken ni Lester Bautista SB Secretary.

Iti kaudian a damag, kalpasan a nadokumento dagiti nakumpiska ken ni Capacap, naipan iti PNP Crime Laboratory, PRO 1, Parian, San Fernando City, La Union para iti drug test ken laboratory examination.

Idi agarup 2:30 ti malem ti Oktubre 23, nangiwayat dagiti operatiba ti Candon police station, PDEA INIS ken ICAG, Ilocos Sur Chapter iti buy-bust operation sadiay Barangay Calaoa-an, Candon City a nagtungpal iti pannakatiliw ni Benjamin Gadong, Jr. y Casila, 49, naasawaan, ken residente iti Barangay San Nicolas, Candon City.

Nakumpiska iti ikut ni Gadong ti maysa nga small heat sealed transparent plastic sachet a nagkarga iti masuspetsa a shabu; 4 pedaso a medium sized heat sealed transparent plastic sachet a nagkarga iti masuspetsa a shabu; 2 kargana a transparent plastic sachet a nagkarga iti mapapati a shabu residue; 6 lighter; 2 nga improvised totter (rolled aluminium foil); maysa a plastic straw (improvised scoop); maysa a black plastic container; nadumaduma a pedaso ti awan kargana a plastic sachet; 4 a getteng; maysa a unit ti My Phone ken dua a P500.00 nga addaan serial numbers nga AM047219 and QY566300 a naaramat a buy-bust money.

Kabayatanna, nakakumpiska dagiti polis iti ikut ti maysa a drug personality iti mapapati a shabu ken drug paraphernalia sadiay Barangay Bonifacio idi agarup 12:15 ti bigat ti Oktubre 24.

Bayat ti panagpatroliada nasalamaan dagiti polis ni Jerwin Inofinada y Rodrigo, 24, naasawaan ken residente iti Sitio Cobocob, Brgy Carusipan, Cabugao, Ilocos Sur, a makipatpatang ken ni Lito Serrano, sabali pay a drug personality, iti sanguanan ti 711 store.

Bayat ti yaasideg dagiti polis, nagtaray ni Soriano idinto a mapapati nga adda intinnag ni Inofinada a bassit a nakupin nga aluminum foil.

Idi binukitkitan dagiti polis, nakitada nga adda naggianna a maysa a heat sealed plastic sachet a nagkarga iti mapapati a shabu.
Nakakumpiska pay dagiti polis iti ikut ni Inofinada iti maysa nga improvised broken tube, maysa a lighter ken nalukot nga aluminium foil.#