3 nabettakan iti rifle grenade

NARVACAN, Ilocos Sur – Tallo a tattao ti nadundunor gapu iti panagbettak ti maysa a rifle grenade a mapapati a nasarakan ti maysa kadagiti biktima iti katabakuan sadiay Sitio Matedted, Barangay Lanipao, ditoy nga ili idi sardam ti Pebrero 16.

Naitaray iti Abra Provincial Hospital da Lanch Callejo y Arkin, 6, ken Charles Liberato y Castillo, 43, baro, mannalon; idinto a naipan iti Dr. Petronilo Seares Memorial Hospital, Bangued, Abra ni Socorro Centeno y Javier, 20, awanan asawa, agnaed amin iti Villa Mercedes, San Quintin, Abra.

Nagsagrap iti dunor iti baba ti makannawan a lapayag ni Callejo; nadunor babaen iti shrapnel wounds iti baba ti makannawan a kilikili ken makannawan a saka ni Liberato; ken naimula dagiti shrapnel iti agpada a saka, dapan ken tian ni Centeno.

Segun iti report, aggatgatud iti tabako dagiti biktima idi nakita ni Callejo ti rifle grenade ket pinidutna sana inted ken ni Centeno a nangibato iti daga a nagresulta iti panagbettakna.

Agtultuloy iti panagimbestiga dagiti polis mainaig iti nasao nga insidente.#