3 nagbato iti bus, nakiareglo

BANTAY, Ilocos Sur – Nakiareglo dagiti tallo a lallaki a natiliw a nangbansag iti maysa a bus babaen ti panangbayadda iti nadadael a sarming ti lugan.

Sadiay Barangay Balaleng, idi agarup 11:30 ti rabii ti Abril 24, kinamat dagiti personnel ti Partas bus dagiti tallo a lallaki a nangbato iti nasao a bus agingga iti naipiskot dagitoy iti nagkamanganda a kaserada iti Barangay Balaleng Purok, ditoy met laeng nga ili.

Nabigbig dagiti suspek a da Michael Aries Sadiri y Galarce, 20, utility worker ken natibo iti Barangay Mabusag, Badoc, Ilocos Norte, Johnson Suizo y Orine, 31, baro, manadier, natibo iti Barangay Cayucay, Alaminos City, Pangasinan, ken ni John Paul Pambid, natibo ti Barangay Barbar, Pinili, Ilocos Norte.

Saanen nga intuloy ti Partas a makasuan dagiti tallo kalpasan nga inkarida a bayadanda ti nadadael a windshield ti bus a mapattapatta nga agbalor iti P37,000.00.#