3 nagbungbong, birbiroken dagiti polis

CABUGAO, Ilocos Sur – Tallo a mangngalap a nasalamaan dagiti kameng ti Bantay Dagat ditoy nga ili a nagbungbong iti Barangay Sabang idi aldaw ti Hunio 25 ti birbiroken dagiti polis tapno agsungbatda iti illegal a panagkalapda.

Iti follow-up investigation nga insayangkat dagiti polis iti Barangay Teppeng, Sinait, Ilocos Sur  babaen ti koordinasion dagiti polis-Sinait, nabigbigda dagiti suspek a da Jimmy Lacuesta aka “Ugo”, naasawaan;  Louie “Botchokoy” Rafanan, naasawaan; ken Christopher Gacan Rafanan, aka “Tupel”, naasawaan, agpapadada a naglemmeng kalpasan ti pannakasalamada a nagbungbong iti kabaybayan ti Barangay Sabang, Cabugao.

Nabigbig ti barangay dagiti suspek gapu iti kolor ti bangkada. Maipakpakat ti color coding dagiti bangka a pagkalap iti probinsia tapno malapdan ti panagkalap babaen ti illegal a wagas a kas iti panagbungbong kadagiti coastal barangays.

Segun iti report, naalerto da Barangay Kagawad Amado Culan Bilen ken Ernesto Laurente Sarabia, agpada a miembro iti Bantay Dagat, ken agpada a residente iti Barangay Sabang, idi makangegda iti ungor ti motor iti kabaybayan a sakup ti Barangay Sabang idi agarup ala una ti parbangon ti Hunio 25.

Kalpasan ti tallopulo a minutos, nakangegda iti napigsa a kanalbuong manipud iti kabaybayan a nakakitaanda iti bangka.

Nagpataaw dagiti Bantay Dagat members ngem nasiputan ida dagiti suspek ket tinarayan dagitoy ti bangkada.

Nasukainan dagiti Bantay Dagat members ti tallo a fuse wenno detonator para iti eksplosibo ken sumagmamano a fishing paraphernalia iti nabati a bangka.

Naipaima ti demotor a bangka, fishing paraphernalia ken tallo a detonators iti kustodia ti police station para iti umisu a disposision.#