MAGSINGAL, Ilocos Sur –  Inwaywayna dagiti kaldingna iti talonna idi alas nuebe ti bigat ti Hulio 10, ngem idi napanna kinita dagitoy iti ala una ti malem, awanen dagitoy iti nakaiwaywayanda.

Ngem saan a nalaka a naupay a nagsapul ni Edwin Ugenio y Gorospe, 51, naasawaan, mannalon, ken residente iti Barangay Bungro, ditoy nga ili, sinurotna ti tugot dagiti kaldingna ket natuntonanna dagitoy iti ikut ti maysa a Michelle Sarmiento y Molina, 25, naasawaan, ken residente iti Barangay Camanggaan, ditoy met laeng nga ili.

Saan a nailanad iti police journal no inukod ni Sarmiento dagiti kalding nga agbalor iti P6,500.00. iti nakaiwaywayanda wenno nakagarut dagitoy ket nakastrekda iti paraanganna.

Iti kaudian a report, napilaanen ni Sarmiento iti kaso a theft ket naipatuloden iti provincial fiscal’s office.#