MAGSINGAL, Ilocos Sur – Adda kadi sisiimen dagiti agdakdakiwas a tallo a lallaki a gandatda a dangran idi agsapa ti Oktubre 31 iti Barangay Puro ditoy nga ili?
Daytoy ti palpalutpoten dagiti inbestigador ditoy nga ili kalpasan a nasukalanda a sangsangaili ti dua kadagiti suspek ken adda sabbikel a paltog ti maysa kadagitoy.
Nainaganan dagiti suspek a da Ronnie Bano y Bayabos, 24, naasawaan, mannalon ken residente iti Barangay Patiao, Peñarubia, Abra; Roy Tayaoan y Basingan, 27, naasawaan, ken residente iti Barangay Malamsik, Peñarubia, Abra ken Ramon Talledo y Ramos, 24, naasawaan, ken residente iti Barangay Puro, ditoy nga ili.
Nakakumpiska dagiti polis iti maysa a Thunder 9, Bersa SA Cal 9 mm pistol a nagkarga iti pito a bala iti ikut ni Bano.
Naipan dagiti tallo agraman ti paltog iti police station para iti maitutop a disposision.
Kabayatanna, naipaiman iti opisina ti provincial prosecutor iti Vigan City ti rekord ti kaso a panaglabsing iti RA 8294 maikontra ken ni Johnsen Tolentino y Urbi, 38, barangay kagawad, ken residente iti Barangay San Ramon, Magsingal, Ilocos Sur.
Maipalagip a nakumpiska iti ikut ni Tolentino idi agarup 10:30 ti rabii ti Nobiembre 1 iti mismo a barangay daytoy ti maysa a CZ 97b cal. 45 auto, nga addaan iti maysa a magasin a nagkarga iti 3 a bala.
Iti sabali a damag, naipanen iti provincial jail ti security guard a nagpaturong iti paltog iti maysa a motorista idi Oktubre 23 babaen ti commitment order a pinirmaan ni Judge Gabino Balbin ti RTC Branch 23, Candon City.
Inaresto dagiti polis-Sta. Cruz ni Jaime Julio y Dao-ayan, 30, baro, security guard iti Aloha Hotel a masarakan iti Candon City ken residente iti Barangay Calaoaan, Sta. Cruz, Ilocos Sur gapu iti panangipulong kenkuana ni Marvin Sibolboro y Calannu, 15, fourth year high school ken residente iti Barangay Gabur Norte, Sta. Cruz, Ilocos Sur a pinaturongan ti security guard iti paltog idi bigat ti Oktubre 23 kalpasan a nainbolbar dagiti luganda iti aksidente.
Kinumpiska dagiti polis ti paltog ti suspek a cal. 38 a marka Armscor 202 ken addaan Serial No. 1150855 a nagkarga iti uppat a bala idi awan ti maipakita daytoy a dokumento ti panagtagikuana.#