3 nagtakaw iti laptop, selpon, napilaan iti kaso iti city prosecutor’s office

STA. LUCIA, Ilocos Sur – Tallo a lallaki ti pinilaan ti polis ditoy iti robbery kalpasan a natiliw ti maysa babaen dagiti immarayat a tanod idi parbangon ti Septiembre 9 sadiay Barangay Damacuag ditoy nga ili.

Iti kaudian a report dagiti polis ditoy, naidatagen iti Candon City prosecutor’s office ti kaso maikontra kadagiti suspek a da Jomar Somao-i y Ding-ayan, 26, naasawaan, laborer, ken residente iti Barangay San Pedro, Sta. Cruz, Ilocos Sur; maysa a Mario Toguedan, residente iti Barangay San Jose, Sta. Cruz, ken maysa a John Doe.

Nasukalan ti panagtakaw idi nasiputan ni Dominador Hafalla y Hafalla, 54, naasawaan, mannalon, ken residente iti Brgy. Damacuag, ti dua a lallaki a rimmuar iti main gate ti balay ni Teddy Isidro nga imetda ti maysa a laptop nga Acer ken CDR King tablet.

Binugkawan ni Hafalla dagiti suspek a dagus a naglibas babaen ti single motorcycle.

Tiniliw met dagiti nagresponde a barangay tanod   ti nabati a kadua dagitoy a nainaganan idi agangay a ni Somao-i sada impaima daytoy ken ti Rusi a motorsiklona kadagiti nagresponde a polis.

Kabayatanna, napasubli ti maysa a tindera ti laptop ken selponna a natakaw kenkuana idi Septiembre 11 sadiay Sta. Maria, Ilocos Sur.

Segun iti report, insubli ti maysa a Melvin Desumala, tricycle driver ken residente iti Barangay Ambugat, Burgos, Ilocos Sur, ti laptop, mouse, Nokia cellphone ken headset, kadagiti polis ti Burgos bayat ti panagtsekpoint dagitoy sadiay Poblacion Norte idi malem ti Septiembre 11.

Kinuna ni Desumala a nabati ti maysa a lalaki a pasaherona ti laptop ken selpon idi dimsaag daytoy iti sango ti junkshop sadiay Barangay Baliw Laud, Sta. Maria, Ilocos Sur.

Natuntonan dagiti polis ti akinkukua a nabigbig a maysa a Eufimia Rabides, aglaklako iti prutas, babaen ti panagtawagda kadagiti nagnagan iti phonebook.

Inted dagiti polis dagiti natakaw ken ni Rabides kalpasan nga impakita daytoy ti police blotter mainaig iti pannakapukaw ti laptop ken selponna.#