3 nagudas iti nagsasaruno a pammaltog

CAMP ELPIDIO QUIRINO, Bulag, Bantay, Ilocos Sur – Tallo manen ti nagudas babaen ti paltog manipud Marso 13 agingga iti 15.

Nainaganan dagiti natay a da Renato Tindoc y Ballete, 49, naasawaan, ken residente iti Barangay Sabang, Cabugao, Ilocos Sur;  Rolando Ramirez y Ramirez, 39, baro, ken residente iti Barangay Lao-ingen, Sto. Domingo, Ilocos Sur; ken ni Eligio Galvan y Elgarico, 79, balo, ken residente iti Barangay Olo-olo, Santiago, Ilocos Sur.

Iti report a dimmanon iti provincial police office ditoy, pimmusay ni Tindoc iti Metro Vigan Cooperative Hospital, Bantay, Ilocos Sur a nakaitarayanna kalpasan a napaltogan idi aldaw ti Marso 13; nasarakan nga awanen ti biag ni Ramirez iti katurodan iti Barangay Lao-ingen idi agarup 11:00 ti rabii ti Marso 14; kasta met a nagsatan ni Galvan iti Candon General Hospital a nakaitarayanna idi agarup 6:40 ti malem iti Marso 15.

Segun iti report, madama nga agal-alad ni Renato Tindoc ken dagiti trabahadorna iti sango ti balayda idi agarup 10:04 ti bigat ti Marso 13 idi immasideg ti kabsatna a ni Fernando Tindoc y Ballete, 46, naasawaan, barangay kagawad, ket kinumprontarna ti biktima no apay nga inaladanna ti dalanna ket nagtungpal daytoy iti nabara nga argumentoda.

Mapapati nga inuksot ti suspek ti paltogna manipud iti siketna sana pinaturongan ti kabsatna ngem ginammatan daytoy ket naginnagawanda ti paltog.

Naagaw ti suspek ti paltog, ket pinaputokanna ti biktima iti naminsan a nagsagrapan daytoy iti sugat iti makannawan a temporal.

Nagsatan iti anges ti biktima iti ospital idi agsapa ti Marso 14.

Iti sabali a damag, inaresto dagiti polis ni Mark Anthony Torreno y Lagasca kalpasan nga inannugotna a kukuana ti Nokia cell phone a nasarakan iti asideg ti nakapasagan ti bangkay ni Rolando Ramirez y Ramirez, 39, baro, ken residente iti Barangay Lao-ingen ditoy nga ili.

Nasarakan nga awanen ti biag ni Ramirez iti katurodan a paset ti Barangay Lao-ingen idi agarup 11:00 ti rabii ti Marso 14.

Nagsagrap ti biktima kadagiti agduduma a sugat iti barukongna a nagtaud iti gauge 12 (buckshot).

Malaksid iti selpon, nakarekobre dagiti inbestigador iti bala ti gauge 12 iti agarup sangapulo a metro manipud iti nakasarakan iti bangkay ni Ramirez.

Iti inisial a panagimbestiga dagiti polis, adda iti dalanna nga aggawid ti biktima idi napaltogan.

Di pay ammo ti motibo iti pammapatay.

Nakasuan ni Torreno iti homicide iti Provincial Prosecutor’s Office, Vigan City.

Kabayatanna, di pay ammo ti motibo iti pannakapapatay ni Galvan a nagudas iti sanguanan ti pagadalan elementaria iti Barangay Olo-olo iti agsapa ti Marso 15.

Iti inisial nga inbestigasion ti polis, kadisdissaag ti biktima iti traysikel ket magmagna nga agturong iti balayna idi binangenan dagiti di nabigbig a suspek a naglugan iti motorsiklo ti dalanna ket maysa kadakuada ti nangpaltog kenkuana iti namindua a daras a nagsagrapanna iti sugat iti makannigid a barukong ken akimbaba a paset ti tianna.

Nagsatan ti anges ti biktima Candon General Hospital a nakaitarayanna.

Nakarekobre dagiti polis iti dua a kapsula ken 3 a bala manipud iti cal .45 iti nakapasamakan ti pammaltog.

Nangiwayat dagiti polis iti pursuit operation ngem saanda a nasapulan dagiti suspek.#