3 nagudas nagsisina a pammaltog iti probinsia

SINAIT, Ilocos Sur – Tallo a lalaki a pakaibilangan ti dua a masuspetsa a drug personality ti nagudas babaen ti pammaltog a naisayangkat iti Sinait, Magsingal, ken Cabugao manipud Oktubre 16 agingga iti Oktubre 19.

Naireport a nagudas iti pammaltog da Jose Francisco Aliño y Perez, 37, residente iti Barangay Puspus, Bantay, Ilocos Sur; Romeo Tiqui y Unabia, 54, barangay kagawad ken residente iti Barangay Puro, Magsingal; ken Sherwin Morales y Sudaria, 34, baro, ken residente iti Barangay Caellayan, Cabugao, Ilocos Sur.

Iti pammaltog iti Barangay Quimmallogong, Sinait a naiwayat idi agarup 2:30 ti malem ti Oktubre 16, naireport a kadisdissaag ni Aliño iti naglugananna idi pinaltogan iti sumagmamano a daras dagiti di nabigbig a suspek a puon ti nakatayanna a dagus.

Nagsagrap ti biktima kadagiti sugat iti rupa ken nadumaduma a paset ti bagina ket mapapati a cal. 45 ken cal. 5.56 dagiti naaramat a paltog kas maibasar iti lima a kapsula a nagtaud kadagitoy a kalibre ti paltog a narekobre iti crime scene.

Iti panagimbestiga ti SOCO team, nakarekobreda iti cal. 38 nga awanan marka ken serial number a nagkarga iti 4 a bala iti siket ni Aliño. Sabali laeng ti nasukainanda iti ikut ti biktima a pakaibilangan ti selpon a Samsung, 2 a bala ti cal. 22 a nasarakan iti sango a bulsa ti biktima, kaha ti pusporo a naglaon iti 3 a narolio nga aluminum foil a nasarakan iti sabali a bulsana, P3,285.00, 3 a deformed slug, ken police bulcap nga addaan inisial a EJB iti uneg a likud.

Kuna ti kapolisan a nakalista ni Aliño a masipsiputan a drug personality iti ili a Bantay.

Dead on arrival iti Central Ilocos Sur District Hospital, Narvacan ni Romeo Tiqui y Unabia, 54, naasawaan, barangay kagawad, ken residente iti Barangay Puro, Magsingal kalpasan a napaltogan iti igid ti baybay iti Barangay Bulanos, Narvacan idi agarup 1:40 ti malem ti Oktubre 17.

Kadua ni Tiqui ti maysa a Julie Ann Aquino a taga-San Quintin, Abra idi napaltogan. Mapapati a kumplot dagiti suspek ni Aquino a nangisayangkat iti krimen.

Iti panagimbestiga ti polis, simmardeng dagiti suspek iti asideg ti nakaparking a Honda CRV ti biktima sada pinukkawan ni Aquino.

Maysa kadagiti suspek immasideg sana pinaltogan iti sumagmamano a beses ni Tiqui.
Naglibas dagiti suspek iti amianan a direksion, kaduada ni Aquino a mapapati nga adda iggemna puraw a plastic bag a di ammo ti kargana.

Nakarekobre ti SOCO team iti dua a kapsula a naggapu iti cal. 45 iti nakapasamakan ti pammaltog.

Kanaig daytoy, naipasdek ti Special Investigation Task Group para iti naparpardas a pannakarisut daytoy a pammaltog.

Kabayatanna, iti mismo a sanguanan ti balayna iti igid ti kalsada ti Barangay Caellayan, Cabugao ti nangtiruan dagiti suspek iti biktimada a mapapati a nainbolbar kadagiti aktibidad iti droga iti barangayda ken nakalista iti drug watch list iti ili a Cabugao.

Awanen ti biag ni Sherwin Morales y Sudaria, 34, baro, ken residente iti nadakamat a barangay idi naidanon iti ospital kalpasan ti pannakapaltogna idi agarup 2:50 ti malem idi Oktubre 19.

Segun iti inbestigasion, agtaktakder ni Morales iti sango ti balayna idi sinardengan ti maysa a puraw a lugan, bimmaba ti maysa kadagiti naglugan sana pinaltogan iti sumagmamano a beses ti biktima.

Naglibas dagiti suspek iti saan nga ammo a direksion.

Naitaray ni Morales iti Suero General Hospital, Cabugao ngem naideklara a dead on arrival gapu kadagiti sinagrapna a sugat iti ulo ken paset ti bagina.

Nakarekobre dagiti inbestigador iti innem a kapsula manipud iti cal. 45 iti crime scene.#