3 naipalab-og iti buy bust operation

3 naipalab-og iti buy bust operation

CANDON CITY – Tallo a tattao ti nanabtuog iti sabali pay nga insayangkat ti kapolisan a nagsina a buy bust operation iti Vigan City ken ditoy siudad idi Nobiembre 26.
Iti drug operation nga inwayat ti Candon City police idi agarup 11:40 ti bigat ti nadakamat a petsa sadiay Barangay Bagani Ubbog, inaresto dagiti polis da Ma. Elvie Botacion y Monje, 46, awanan asawa, ken Metche-ann Corcilles y Gavino, 25, awanan asawa, agpada a residente iti nasao a barangay kalpasan a nakakumpiskada ken ni Botacion iti tallo a plastic sachet a naglaon iti mapapati a shabu; 2 a nagawangan a plastic sachet nga addaan iti mapapati a shabu residue; ken drug paraphernalia a pakaibilangan ti maysa a water pipe; 2 improvised plastic straw scoop; maysa nga improvised aluminum foil totter; 2 digital weighing scale; maysa nga usado nga aluminium foil a mapapati nga addaan shabu residue; 3 a getteng; Samsung cellular phone; maysa a pakete ti transparent plastic sachets a naaramat kas pagkargaan; maysa a BB-Q stick a mapapati nga addaan shabu residue; improvised gas lamp; live ammunition para cal. 45; 2 small heat-sealed transparent plastic sachet a naglaon iti mapapati a shabu a naikabil iti bassit a plastic sip lock; P1,566.00 iti nadumaduma a denominasion; 3 crumpled nga usado nga aluminium foil a mapapati nga addaan shabu residue; maysa a bassit a plastic container a nagkarga kadagiti plastic sachets a mapapati nga addaan shabu residue ken uppat a sag-P500.00 a naaramat iti buy bust operation.

Iti sabali a buy bust operation a naisayangkat idi agarup 2:30 ti malem iti nadakamat a petsa iti Zone 5, Bantay, Ilocos Sur, partikular iti amianan a paset ti Quirino Stadium, tiniliw dagiti polis ni Marwin Langgi y Bartolazo, 35, baro, natibo iti Barangay Kidawen, San Juan, Abra ngem agdama nga agnaed iti Barangay San Julian Norte, Vigan City apaman a naiyawat ti nagpammarang a poseur-buyer ti marked money iti suspek.

Nakakumpiska dagiti polis iti ikut ni Langgi iti maysa a heat sealed plastic sachet a nagkarga iti mapapati a shabu ken P500.00 a marked money; 5 a sag-P20.00; ken Sky Mobile cellphone.

Sinaksian ti pannakabagi ti DOJ ken barangay officials ti Zone 5, Bantay ti nasao nga operasion.

Naipan ti suspek ken dagiti nakumpiska kenkuana iti police station para iti dokumentasion sada naipaima iti Ilocos Sur Police Provincial Office Crime Laboratory para iti pannakaamirisda.#