3 naitawtaw a mangngalap, naisalakan

NARVACAN, Ilocos Sur – Tallo a mangngalap manipud Barangay Gabao, Santiago, Ilocos Sur ti naisalakan iti nagsina a naiwayat a rescue operation bayat ti panagkatangkatangda iti kabaybayan idi malem ti Agosto 1.

Inalaw dagiti residente iti Barangay Biao, Sta. Maria, Ilocos Sur da Edwin Etrata y Etrata, 28, awanan asawa; ken  ni Mark Christian Escalona y Tauro, 23, awanan asawa, bayat a maiyan-anud ti bangkada iti kabaybayan a sakup ti nadakamat a barangay idi agarup 10:30 ti bigat Agosto 1.

Naalaw met ti kalugaranda a ni Denmar Balisong, 24, naasawaan, babaen dagiti coast guard iti kabaybayan a paset ti Barangay Sulvec, Narvacan idi agarup 4:10 ti malem iti dayta met laeng a petsa.

Iti salaysay da Etrata ken Escalona, idi agarup 8:00 ti bigat ti Agosto 1, kaduada ni Balisong a nagpataaw a  nakalugan iti de-motor a bangka tapno apanda itakdang ti sibit-sibit nga inyanud dagiti dakkel a dalluyon.

Nakita dagiti tallo ti sibit-sibit sumagmamano a milia ti kaadayona iti igid. Timmapog ni Balisong tapno igalutna ti sibit-sibit ngem naibbatanna ti tali ket naiyanud daytoy nga immadayo agraman ni Balisong.

Pinadas da Etrata ken Escalona a kamakamen ti maiyan-anud a sibit-sibit ngem nagdadael ti motor ket naiyanudda metten.

Inarayat dagiti agindeg iti Barangay Biao, Sta. Maria da Etrata ken Escalona idinto a nakikoordinar ti coast guard ken PDRRMC kadagiti kabangibang nga ili para iti pannakaisalakan ni Balisong a nagresulta iti pannakaisalakan daytoy bayat ti panagkatangkatangna iti kabaybayan a paset ti Barangay Sulvec, Narvacan.

Idi agarup 5:00 iti dayta met laeng a malem, inyawat ti coast guard ni Balisong iti pamiliana ken barangay officials ti Gabao.#