Footer

3 nakasuan panagsalungasing iti election gun ban

BANTAY, Ilocos Sur – Nakiririda iti bar a napananda naginuman; ti makadakes, nakapkapan dagiti nagresponde a polis ti maysa nga adda ikutna a paltog nga ad-adda a nangpadagsen iti kasoda ta saan laengen nga illegal a panagikut iti paltog no di payen panag-salungasing iti election gun ban ti naisalpak maikontra kadakuada.

Napilaan iti opisina ti provincial prosecutor iti Vigan City iti kaso a panagsalungasing iti RA 8294 wenno illegal possession of firearm ken iti Comelec gun ban da Rommel Medrano y Peria, 18, baro; Jonathan Medrano y Garvin, 19, baro; ken Alvin Medrano y Medrano, 25, naasawaan, agpapada a residente iti Nagsangalan, Vigan City.

Nagresponde iti agarup 11:50 ti rabii ti Oktubre 3, 2010 dagiti polis ditoy nga ili iti FKRM bar a kukua ni Flor Pelayo a masarakan iti Barangay Sinabaan, Bantay, Ilocos Sur kalpasan a nakaawatda iti report nga adda riribuk a napasamak iti nadakamat a paginuman.

Mapapati a kinaringgor dagiti tallo a suspek ni Marvin Pato, residente iti Barangay Paing, Bantay, Ilocos Sur.

Idi makadanon dagiti polis iti nasao a bar, intudo ti akinkukua dagiti suspek nga aglibas koman nga aglugan iti motorsikloda.

Kinapkapan dagiti polis dagiti tallo ket nakasukainda iti cal .38 nga addaan iti tallo a bala iti ikut ni Alvin Medrano.

Impan nga immuna dagiti polis dagiti suspek ken ni Pato iti Gabriela Silang General Hospital para iti pannakaagasda sakbay a naikustodia dagiti suspek iti police station ditoy.

Nangrugi nga inyimplementar ti kapolisan ti gun ban bayat ti election period a nangrugi idi Septiembre 25, 2010 ken agtunged inton Nobiembre 10 kas panagtungpal iti Resolution No. 9028 ti Comelec kalpasan a naituding a maangay ti 2010 Barangay ken Sangguniang Kabataan elections inton Oktubre 25.

Indeklara metten ni Pres. Benigno Aquino III a bakasion ti Oktubre 25 tapno maikkan dagiti umili iti naan-anay a tiempo a mapan agbutos iti presintoda.#