3 nakipaskua iti ospital gapu iti aksidente

BANTAY, Ilocos Sur – Tallo a tattao ti nakipaskua iti ospital gapu ta nainbolbar ti luganda iti aksidente sadiay Magsingal ken ditoy nga ili.

Iti ospital ti nangpalabsan ni PO3 Edgar Anthony Ragonton y Rebellon, 34, miembro ti PNP Maritime a nakabase iti Mindoro, Vigan City, ken residente iti Mabilbila Norte, Santa, Ilocos Sur iti aldaw ti Paskua gapu iti panangdungparna iti poste ti elektrisidad sadiay Barangay Bulag, Bantay idi agarup 3:28 ti agsapa ti Disiembre 25.

Iti panagimbestiga dagiti polis, agdaldaliasat nga agpadaya iti national highway ti Toyota Corolla a minaneho ni Ragonton ket idi makadanon iti Barangay Bulag, maysa a di nabigbig a behikulo a naggapu iti abagatan ti kellaat a simrek iti highway.

Iti pananglisi ni Ragonton iti lugan, napukawna ti kontrolna iti manibela ket dinungparna ti poste ti elektrisidad ti ISECO ken ti street light iti amianan a paset ti kalsada sa naidaknir iti kataltalonan.

Nagsagrap ni Ragonton kadagiti garadgad kadagiti nadumaduma a paset ti bagina ket naitaray iti Gabriela Silang General Hospital para iti pannakaagasna.

Nakaro met ti kuppil ti sungo ti kotse, nadadael ti poste ti elektrisidad ken ti silaw ti kalsada.

Kabayatanna, nasugsugatan dagiti nagsakay iti motorsiklo kalpasan a sinapgid ti luganda ti maysa a kotse sadiay Barangay San Clemente, Magsingal idi agarup 9:50 ti rabii ti Disiembre 25.

Iti Magsingal District Hospital ti nangpalabsanda iti Paskua da Vicente Ursulum y Quitevis, 18, awanan asawa ken ti back rider a ni Aaron Arellano y Mangay-ayam, 19, awanan asawa, agpada a residente iti Barangay San Clemente gapu kadagiti sinagrapda a sugat maigapu iti pannakaaksidenteda

Kas maibatay iti report, napardas ti panagpataray ni Ursulum a nagmaneho iti Honda Wave a motorsiklo ket idi makagteng iti nakapasamakan ti aksidente, napukawna ti kontrolna iti manibela ket nasapgid ti motorsiklo ti Toyota Fortuner a kukua ti maysa a Cretita Domingo y Rabino, 45, awanan asawa, bakasionista manipud iti Taytay, Rizal.

Nakaparada ti kotse iti makannawan a linia ti kalsada idi sinapgid ti Honda Wave a puon ti nakaikrasan da Ursulum ken ti kinasakayna.

Gapu itoy, nagsagaba ni Ursulum kadagiti dunor iti nadumaduma a paset ti bagina idinto a nadunor ti ulo ken bagi ni Arellano.

Segun iti report, nakainom dagiti dua nga agtutubo idi napasamak ti aksidente.

Sabali pay nga aksidente ti napasamak iti sango ti Municipal Public Market, Barangay Barangobong, Sta. Lucia. Ilocos Sur idi agarup 4:50 ti malem iti daytoy met la a petsa a nakainbolbaran ti maysa a Honda tricycle , Fuso truck ken Rusi motorcycle.

Iti panagimbestiga dagiti polis, agpaamianan ti Honda tricycle a minaneho ni Rudy Halleggado y Moreno, 55, naasawaan, ken residente iti Barangay Luba, Sta. Lucia, ken ti Fuso dump truck a minaneho ni Rodel Catcatan y Gila, 24, baro, residente iti Barangay Castro, Sudipen, La Union idi mapapati a dinungpar ti truck ti kutit ti traysikel a nakaigapuan ti pannakatinnag ni Halleggado ken pannakaatal ti truck kenkuana.

Nagsagrap ni Halleggado iti nakaro a dunor iti ulo ken bagina a nakagapu iti ipapatayna.

Gapu iti pigsa ti pannungpar, dinungpar met ti traysikel ti Rusi motorcycle nga adda iti dayaen a paset ti kalsada iti sanguanan ti public market a puon ti nakadunoran ti nakalugan a ni Nelson Biteng, 50, naasawaan, residente iti Barangay Palali Norte, Sta. Lucia, Ilocos Sur. (Tawid News Team)